Shillong, Lber 13:U CEM ka KHADC u Bah Pynïaid Sing Syiem haba ai khublei ïa u nongïalam ka liang ïatei u Bah Titosstarwell Chyne uba la wanrah ïa ka phang halor ka jinghiar ka ïoh ka kot bad ka jingkyrduh kam u la ong ba kane ka dei ka mat kaba donkam bha bad u la ong ba ka long kaba donbok ruh ba ka jingïoh ha ka KHADC ïa ka khyrnit kaba 6 ka long kum ka stieh ban ïada ïa ka jaitbynriew.
Halor kane ha kaba ïadei bad ka jingdonkam ban ai kam ai jam ïa ki khun samla u CEM u la ïathuh ba kane ka EC kaba mynta ka la pyrkhat ban wanrah ïa ka Skill Development Programme ban kyntiew ïa ka sap khnang ba kin lah ban sengkam lajong.
Haba phai sha ki kam ri jingri u CEM u la ïathuh ba kumba 60 na ka 100 dei ka mar kaba wan nabar bad kumba T.200 klur shisnem hap pynlut ban siew sha kiwei ki jylla, kumta ka EC kan pynshlur ïa ki kam ri jingri, kam rep, ki kam ba shna da ki kti bad kiwei ban kyntiew ïa ka ïoh ka kot ki briew lajong.
Halor ka jingdon ki kompeni kiba wan nabar ban khaïi hapoh ki jaka ka KHADC u CEM u la ong ba ka Council kan pyrkhing ïa ka jingai laisen watla ka long kaba eh ban leit khynra manla ka por na ka daw ka jingduna ki pulit Enforcement kiba don tang 70 ngut katba ki hap pat ban peit ïa ki 5 tylli ki distrik kumta ka EC kan pynkhlaiñ ïa ki shnat treikam kiba don ha ki distrik khnang ban lah pyrkhing ïa ki rukom ai laisen khaïi sha kiwei kiba nabar jylla.
