Kumba 283 tylli ki shnong ha Meghalaya ki ïatreilang hapoh ki Watershed ban pynneh ïa ki jaka pynlang um

Shillong, Nailur 30 : Ka sienjam ba la shim hi da ki paidbah ban wanrah jingkylla ha ka rukom pynneh pynsah ïa ki jaka pynlang um lyngba ka Reform Utsav kan sdang naduh ka 02tarik Risaw, 2026 ha kaba kin don haduh 9593 tylli ki Gram Panchayat ha baroh kawei ka ri kiban sam jingtip lyngba ki Gram Sabha hapoh ka People’s Plan Campaign – Sabki Yojana Sabka Vikas.
Ha Meghalaya, kane ka jingïatreilang kan kynthup ïa kumba 283 tylli ki shnong hapoh 32 tylli ki Watershed Development Projects, bad hadien kata yn pynlong ruh ïa 12 tylli ki prokram ha ki kyrdan district bad katkum ki project, ong ka khubor na ka tnad Soil and Water Conservation Department.
Ka jingthmu jong kane ka jingpyrshang ka long ban pynkylla ïa ka rukom pynlang um sha ka Jan Andolan, ong ki Ophisar.
Ka tnat ka la ong ba ha ka ri baroh kawei, hapoh kine ki 12 snem ba la leit, la lah ban kynthup kumba 3.4 crore hectare hapoh ki prokram watershed. Ki project kiba la dep ki la pyni ïa ka jingkiew haduh 3 metre ha ka um hapoh khyndew, ka jingkiew haduh 30 percent ha ka jaka rep, ka jingkiew haduh 40 percent ha ka jingpynmih ïa ka dud, bad ka jingkiew haduh 70 percent ha ka jingïoh lum pisa na ka kam rep man la u snem.
La ïathuh ba ha Meghalaya, la lah ban wanrah haduh 5,325.23 hectare hapoh ka soil bad moisture conservation, bad 7,716.85 hectare hapoh ka plantation, horticulture bad afforestation.
Haba kren shaphang ki jingkylla hapoh ka WDC-PMKSY, ka tnat ka la ong ba ka jingbei tyngka ka la kiew na 12,000 tyngka sha 22,000 tyngka shi hectare ha ki jaka madan, bad na ka 15,000 tyngka sha ka 28,000 tyngka shi hectare ha ki jaka lum. Ha kajuh ka por, ka por ban pyntreikam ïa ki project ka la shah pynlyngkot na 7 snem sha 5 snem, khnang ban pynsted ïa ka jingpynpoi ïa ki jingmyntoi.
Kiwei pat ki jingtreikam ki kynthup ïa ka jingpynpoi ïa ki symbai kiba bha, ki tiar rep kiba kham bha, bad ka springshed development ha ki thaiñ lum nalor kiwei kiwei.
La ïathuh ruh ba ki don haduh 411 tylli ki tyllong um la lah ban pynim thymmai, bad kane ka la pyni ïa ka jingkiew haduh lai shah ha ka jingmih um, bad ka um ka la lah ruh ban ïai don slem. Kane ka la ïarap ban pynduna ïa ka jingduna um ha ki jaka lum.
Ka tnat ka la ong ba ki prokram kiba la sdang mynshwa, kum ka Watershed Yatra bad Watershed Mahotsav, ki la pynthikna ïa ka Jan Bhagidari, lane ka jingïashim bynta jong ki paidbah, ha ka jingpynlong bad ka jingpynneh pynsah ïa ki jingtei ban pynneh ïa ka um.