Kumba 1900 tylli ki ophis Sorkar la pyndait lut da ki Solar Light ha Jammu-Kashmir

Jammu, K’Lyngkot 06 : Ki la don kumba 1900 tylli ki ophis sorkar kiba la pyndait lut da ki solar plant ha ki tnum ophis treikam ha Jammu and Kashmir bad la buh thong ruh ban pyndait pat sa kumba 20,000 tylli ki iing sorkar ha shwa ban kut jong u Nohprah 2025.
Na ka liang u Commissioner Secretary, Science and Technology, Saurabh Bhagat u la ong ba ki ophis treikam jong ka sorkar ki la don haduh 22,494 tylli kiba rejistar ha kylleng ka Union Territory ha kaba ka jingmang jingdonkam ka la kot sha ka 486 megawatt.
Utei u heh sorkar u la ïathuh ïa kane hadien ka jingïalang bad u Chief Secretary ka jylla, u Atal Dullo ban pyntreikam da katei ka buit ban tan bording na ka sngi ha baroh ki ophis sorkar ha shwa ban kut u Nohprah 2025 kaba long katkum ka thong ba la buh da u Myntri Rangbahduh ka Ri, u Narendra Modi ha ka jingïalang kaba dang shu lah shen bad baroh ki Chief Secretary ba la tip kum ka Chief Secretaries Conference ha New Delhi dang shen.
Utei u Commissioner Secretary u la ong ruh ba ki don kumba 19000 tylli ki iing sorkar kiba la dep ban pyndait da kitei ki solar plant la ka long da ka Jammu and Kashmir Energy Development Agency (JAKEDA) lane da kiwei pat ki tnad sorkar ha ka jingmang ban ïoh tan bording haduh 27.61 MW haduh mynta. Shuh shuh u ong ruh ba ba lah ban ïoh sa kumba 300 MW da kaba pyndait da kitei ki solar plant ha kitei ki 20,000 tylli ki jingtei ba dang sah.
Haba kren ha ka jingïalang, u Chief Secretary u la banjur halor ka jingdonkam ban pdiang bad pyndonkam hok ïa ka bording na ka sngi ha katei ka Union Territory katba lah ei.
U la ai jingmut ruh ba donkam ban pynlong kham bun shuh shuh ki jingïalang khamtam bad kito kiba kompeni ba kham heh kum ka NHPC, NTPC lane ka SECI ban ïoh pyndonkam pura ïa katei ka buit na ka bynta ka jingmyntoi jong ka jylla da kaba sdang shwa na ki ophis treikam jong ka sorkar jylla.
U ong ruh ba nalor ba ka sorkar ka la ai bor ha ka JAKEDA ban kitkhlieh ïa kane ka kam, hynrei ka sorkar ka pyiar ruh ka kti ban kyrshan lang ïa kito ki agency kiba kwah ban pyntreikam ïa kane ka prokram ha J&K.