Kulmar ka khwai dohkha ha Umran Ñiangbyrnai ba suba rah dohkha nabar, dawa ki rawon ban pynphai ïa ka pisa

Nongpoh, Nailur, 27: Ka kam ïakulmar haka lympung ïakop khwai dohkha kiba la ju mih naka por shaka por kala jia biang mynta ka kynti ha ka jingïakop khwai kaba la long mynta ka sngi ha RRTC Umran, ha kaba da ki hajar ngut ki rawon kiba la ap khui naduh dang step ban sei dohkha, kila bitar hadien bala suba ba uwei u briew u la rah bad leit thew da ka dohkha kaba wanrah nabar bad kaba la ïap lypa.
Katkum ka jingtip bala ioh lum kane ka jingjia kala jia tang hadien kumba katto katne por bala sdang ka jingïakop bala pynbeit ba kan sdang naduh ka por 9 baje haduh 3 baje, hynrei hapdeng ka jingïakhun jong kiba bun ki rawon ban sei dohkha natei ka pung, uwei u briew u la sei ïaka dohkha ban leit sha jaka thew bala suba ruh ba kadei ka dohkha kaba rah nabar ka dei kaba la iap lypa, ha kaba kala mih ka jingpyrshah kaba jur naki rawon kiba shim bynta ha katei ka jingïakop kiba la kynnoh ruh ba u lah ban donkti lang bad ki nongpynïaid jong katei ka jingïakop.
Ha katei ka jingpyrshah naka liang ki paidbah bad ki rawon kiba la bitar, kila ktah kti ruh ïa utei u suba donkti ban rah dohkha nabar bad kumjuh ruh ïaki bor pynïaid kiba la pyrshang ban ïada ïa u ha kaba la rah mar mar sha ïing Dorbar katba ki nongpynïaid katei ka jingïakop kila phet krad na katei ka jaka.
La ioh jingtip ruh namar ka huri hura kaba la jur ki pulit ruh kila poi ha katei ka jaka bad rah noh mardor ïa utei u ba shah kynnoh rah dohkha nabar ban lait naka jingshah ktah kti haki paidbhur rawon, bad haka jingtohkit u la phla ruh ba u la leh ïa katei ka kam bad rah ïaka dohkha nabar ryngkat ka jingsuhbuit bad ki paralok ban leh ïa katei ka kam naka bynta ban rah ïaka nam jop namar ka khusnam lahduh jong katei ka jingïakop ka long haduh 10 lakh, 4 lakh ïa u ba wan ba ar bad 2 lakh naka bynta u ba wan ba lai bad kiwei kiwei ki khusnam.
Shuh shuh halor katei ka jingkulmar kaba la mih ha katei ka jaka ïakop khwai naka liang ki rawon kila dawa ruh ba dei ban pynphai lut baroh ka pisa bai tiket kaba kila thied haka dor T.2000/- kawei, hynrei naka liang ki bor pynïaid kila artatien ban pynphai ïa katei ka pisa ha kaba ki rawon ki dang ap beit khui ha katei ka jaka haduh ka por janmiet.