Lyngba ka RTI lap ka FKJGP bym pat treikam ka Rambrai C&RD Block

0

Nongstoiñ, Nailur, 27: Ka Rambrai C&RD Block ka la jan dap shi snem naduh ba u Conrad Kongal Sangma Myntri Rangbah ka jylla, u la wan ban plie ïa ka ha u bnai Naiwieng jong u snem ba la dep, ha kaba ka long tang kum ka jingpynkmen tohhoh ïa ki paitbah, ong u bah Jistarland Lyngkhoi president ka FKJGP Rambrai circle haba ïakren bad ki lad pathai khubor mynta ka sngi.
Utei u nongïalam ka seng u la ong ruh ba hadien ba ki paitbah nongshong shnong ka thaiñ ki la ujor na ka por sha ka por, ki nongïalam ka seng lyngba ka Right To Information ki la pan jinghsai na u Public Information Officer jong ka District Rural Development Agency jong ka West Khasi Hills, ha kaba ïadei bad ka jingtreikam jong katei ka Block.
Hadien ba u PIO u la ai ka jubab da ki jingthoh, la lap ba haduh mynta ym pat don nongtrei satia bad wat u Block Development Officer ïa u ba ka sorkar ka la pynbna ba ka la dep thung ba un peit shipor ïa ka jingtreikam ha katei ka Block ruh um pat don satia haduh mynta.
Nalor kata u la ong ruh ba lyngba katei ka hok wad jingtip la lap ruh ba na ka bynta ki kam ba la pyllait ïa ka Advertisement ha u bnai Nailar ba la dep, hynrei ki nongtrei pat kim pat don bad ïa baroh ki kam ki dang hap ban pyndep na Nongstoiñ C&RD Block Office.
U la ong ruh ba katkum katei ka jubab jong u PIO, la lap ruh ba ki don ki nongtrei kiba la thung tang da ka contractual basis bad ki kam ba ki dei ban trei, ka long tang na ka bynta ka MNEGA bad ka PMAY, tangba haduh mynta kim shym pat la trei ha Rambrai.
Utei u nongïalam ka seng u la ong ruh ba katkum ki mat jong ka jingwad jingtip jong ka jubab jingthoh, kam shym la pynshai satia ba la dep ïoh ne em ïa ka jaka ban tei ïa katei ka Block Ophis lane haduh katno la mang pisa na ka bynta ban tei ïa ka.
Kumta halor katei ka jubab jingthoh ba la ïoh na u PIO, ka seng kam sngewhun satia bad kan nym shong thait hynrei kan ïai buddien na ka por sha ka por na ka bynta ban tip ïa ki jingshisha.
U la ong ruh ba ka seng ka dawa na ka sorkar ba kam dei ban pynkylla ishu politik ïa katei ka kam, namar ka dei na ka bynta jong baroh ki paitbah jong ka thaiñ Rambrai. Ka seng ka dawa ruh na ka sorkar ba ka dei ban pyntreikam noh kloi katba lah ïa katei ka Block, khnang ba ki paitbah ka thaiñ kin ym jynjar palat haba ki leit donkam bad ba kan long ruh ka jingmyntoi ïa ki paitbah nongshong shnong.

Leave A Reply

Your email address will not be published.