Nongstoiñ, Nailur, 27: Ki bor pynïaid District ha ryngkat ka jingïatreilang bad ka DDMA West Khasi Hills, ki la pynlong ïa ka training kaba ar sngi lynter kaba la sdang mynta ka sngi ka 27 tarik bad ban pynkut lashai ka sngi ka 28 tarik u Nailur 2023 ha Trysem Hall, kaba long kum ka jingpynkhreh ïa ka Mock Drill kaba yn sa pynlong ha ka 12 tarik u Risaw 2023.
Ha kane ka training programme la wan ban ïa shim bynta ruh da u DC bah Garod LSN Dykes IAS, ki ADCs, Add. SP, EACs bad ki ophisar jong ki Department bapher bapher. Ka jingpynlong ïa kane ka training ka long ruh kumno ban ai jingïada lada wan kano kano ka jinglynshop ki bor mariang la ka long na ka jingshlei um, u jumai bad kiwei kiwei.
Ha kane ka training ki resource person ki la ai ïa ka jingbatai bniah halor ka phang kren ‘& Responsibility of IRS’ bad kumno ban leh ïa ka Mock Drill na u bah J.Mawthoh DDMO West Khasi Hills District bad Roles & Responsibilities, Organisa-tional Structure and Staffing na u bah HB Marak, IAS (Retd) & DDMA.
Kiwei kiba la ai jingkren ki long bah Garod LSN Dykes ba la ai ïa ka jingkren pdiang bad ban jur ïa ki officer ban pynleit jingmut bha ha kane ka training, khnang ba ka Mock Drill kaba yn sa pynlong kan long kaba jop bad kaba ai jingmyntoi, lada wan kino kino ki jingjia lynshop jong ka mariang. Ïa ka programme la pynïaid da u bah HK Thabah ADC bad CEO DDMA, Nongstoiñ.
