Shillong, Naitung 13: U Myntri ka Development of North Eastern Region Jyotiraditya M Scindia, ula kular ban ai ïa baroh ki jingïarap sha ka Meghalaya ba kan kyntiew ïalade ha ki kam jngohkai.
U Scindia uba la don ha Shillong, ula ïakynduh ïa u Myntri Rangbah ka Jylla Conrad K Sangma bad pynïaid ruh ïa ka jingïalang bishar kam ha ka jingïadonlang u Secretary ka DoNER Chanchal Kumar, u Secretary ka NEC Angshuman Dey, u Chief Secretary ka Jylla Bah DP Wahlang bad kiwei kiwei.
U Myntri ka Sorkar Pdeng ula ai ruh ïa ki jingai jingmut bad ki jingbatai halor ki skhim ki ban nang kyntiew ïa ka jingpyndonkam ïa ka technology, ka jingïada ïa ka mariang bad ka kam jngohkai ha Meghalaya. U la kular ruh ban ai ka jingkyrshan ba pura ïa u Myntri Rangbah ka Jylla.
U Myntri Rangbah ka Jylla Conrad K Sangma ula kren halor ka bynta jong ka DoNER bad ka NEC haba ïadei bad ki kam pynroi jong ki Jylla, haba ban jur ïa ka jingïatreilang jong baroh ki jylla ka thaiñ nalor ka jingthaw ïa ki lad ki lynti ban kyntiew ïa ka rep ka riang khnang ban pynkupbor ïa ki paid nongrep ha ka Jylla. U la ong ruh ba donkam ruh ïa ka Ministry ba kan shim ïa ki sienjam ban leh eiei ha ka ban khring ïa ki jingkynshew kam hapoh ka thaiñ.
Ha ka jingleit ïuhkjat ha NEC Secretary ha Shillong, u Scindia ula ïoh ïakren bad ki paid nongrep ka jylla kiba la ïoh jing myntoi ba ki project kam rep bala bei tyngka da ka NEC.
Ha kane ka sngi, u Scindia ula pyllait paidbah ruh ïa ka NERACE App ka ban pynïajan ïa ki nongrep bad ki nongdie ha ka rynsan digital. Kane ka dei ruh ka sienjam kaba khraw bha ha kaban lah pynïaid ïew ïa ki marrep ka thaiñ bad ban wanrah lang shi jaka ïa ki 50,000 ngut ki nongrep bad 5000 ngut ki nongthied ha kine ki 5 snem ban wan.
Haba kren ha ka jingïalang, u Scindia ula ong ba ka North Eastern Region Agri-Commodity e-Connect (NERACE) ka dei ka web portal bad ka mobile app ba la pynwandur ban pynïajan ïa ki nongrep ka thaiñ Shatei Lam Mihngi ka Ri India bad ki ïew ka pyrthei.
“Kane ka matti jong ka DoNER Ministry ka pyni ïa ka jingkut jingmut jong ngi ban pynkupbor ïa ki nongrep da kaba ai ïa ka rynsan kaba kin lah pynïaid ïew ïa ki marrep bad ïadait dor ha ka por kaba biang bad ruh ban ïapynbeit lypa ïa ka ïadie ïathied,” ula ong.
