Shillong, Lber 05 : U Symbud Myntri Rangbah ba dei peit ïa ka tnad Kampohiing ka Jylla, Bah Prestone Tynsong ha ka sngi Balang u la kular ba ka jingshna ïa ka ophis jong ka Emergency and Fire Service Station kaba don ha Mawryngkneng yn sa sdang noh shen.
Haba jubab halor ka jingkylli ba wanrah da u MLA ka thain Bah Heavingstone Kharpran, na ka liang u Symbud Myntri Rangbah u la ïathuh ba ka deputy commissioner ka la dep ban aiti ia ka jaka kaba heh 22000sqft sha ka tnad pulit. Kumta, u ong ba shen kin sa sdang noh ïa ka jingtrei.
“Hadien ba la dep kane, ka jingtreikam jong ka fire service station kan sa sdang noh,” la bynrap biang u Symbud Myntri Rangbah da kaba pyntip ruh ba ka engineering wing jong ka tnad Kampohiing ka Jylla kan sa pynkhreh ïa ka Detailed Project Report (DPR).
“Tang shu dep pynkhreh ïa ka DPR, ngin sa rah ban ïoh ïa ka mangtyngka bad nangtei ka kam kan sa sdang noh,” u la ong.
Halor ka jingkylli ba wanrah da u Nongïalam ka Liang Pyrshah, Dr. Mukul Sangma, na ka liang u Symbud Myntri Rangbah u la ong ba ka jingshna ïa ki fire station ha kylleng ki jaka kadei kaba ka sorkar jylla ka peit thuh katkum ka jingjia ba ju don ki jingpluh ding.
