Shillong, Lber 05 : U Myntri Rangbah ka Jylla Conrad K Sangma ha ka Sngi Balang ula ong ba ka Sorkar MDA kala lah ban pynurlong ïa ka jingkylla ha ka ïoh ka kot ka Jylla Meghalaya bad ki nongshong shnong naduh u snem 2018.
Haba wanrah ïa ka mang tyngka ha ka sien ba phra, u Conrad ula ong “Ngi la kynjoh ïa ka 11% ka jingkiew ha ka ïoh ka kot ha kine ki 7 snem bala leit noh. Kane ka jingkiew kala urlong da ka jingpynïar ïa ka jingkynshew pisa namar ka jingnang ïoh bun ka bhah khajna na ka Sorkar Pdeng bad ka jingpynmih khajna nala Jylla, ka jingpyntrei bha ïa ki scheme ba bei da ka Sorkar Pdeng, ki Externally Aided Project (EAP), bad ki skhim thymmai kum ka Special Assistance to States for Capital Investment (SASCI)”.
U pyntip ïa ka ïing dorbar ba hashuwa u 2018, ki jingkheiñ halor ka ïoh ka kot ka Meghalaya bad ka roi ka par haba ïa nujor ruh bad kiwei ki Jylla ka thaiñ Shatei Lam Mihngi ka pyni ka por hapdeng u snem 2010-2018 ka dei ka por ba eh bha ha ka pla tyngka ka Jylla.
Ula ong ba ka Jylla ha ki snem bala leit kam shym la lah ban kynshew pisa ba donkam ha kiba bun ki kam kum ha ka koit ka khiah, ka pule dangle bad ruh ki jingtei ba kongsan kum ki surok, ka jingpynbiang umbam umdih bad bording hynrei mynta kine kiei kiei baroh kila kylla lut naduh u snem 2018 hadien ba shimti ka Sorkar MDA.
“Kum ka nuksa, haba kheiñ ïa ka jingïapher jong ka Multi-dimensional Poverty Index (MPI) ka Assam bad Meghalaya ka pyni ba kumno kine ki ar jylla ki don ïa kajuh ka jingkheiñ halor ka jingduk haba sdang jong une u snem bad kumta ka Assam kala lah ban pynduna ïa ka MPI da 13% katba ka Meghalaya kala lah pynduna tang da 4.8%” ula bynrap.
Ula pyntip ba wat hapdeng ka jinglyngshop ka khlam Covid, ka Jylla kala lah ban pynbeit janai ïa ka pla tyngka, pynjanai ïa ka synshar khadar bad pynkhlaiñ bha ïa ka jingai jingshakri, ïada ïa ka hok jong ki paid trai ri, pynneh ïa ka shongsuk shong saiñ bad ban kynshew pisa ha kiba bun ki tnad treikam ban wanrah ïa ka jingkylla.
“U soh jong kine ki jingkynshew kila paw mynta ha ki kam kum ka koit ka khiah, ka jingpynbiang umbam umdih, ka kam jngohkai, ka jingpynkupbor ïa ki kynthei, ki nongsengkam, IT bad ka bording. Hynrei ki jingkheiñ ha ki kam kum ka kam rep, pule dangle bad pynbiang jingbam tei met ki dei kiba dang shimpor ba kin kylla. Ka Sorkar kala kut jingmut ban trei shitom bad pynkhlaiñ ïa ka jingïatreilang ban pynthikna ïa ka jingpynjanai ha baroh ki thong ka roi ka par kaba neh” ula ong.
