Nongpoh, Ïaiong 03: Hadien bun snem ka jingap khmih lynti ki paidbah jong ki phew tylli ki shnong ha shilynter jong u surok Nongpoh-Umden-Sonapur, u myntri rangbah ka jylla u Conrad K Sangma ha ka jingwan iuhkjat jong u ha ka shnong Purduwa ha Ri-Bhoi District ban ïaid lyngba ka surok ban leit sha Umden u la ong ba kane ka dei shisha ka jingeh kaba khraw jong ki paidbah bad pynthikna syndon ba katei ka kam, kam slem shuh hadien bala dep ban mang ïa ka pisa bad ban aiti sha u kontraktor ban sdang noh ïa ka kam tang ha kine ki khyndiat taiew ban wan. Na ka liang u Myntri Rangbah u la pynpaw ruh ba ki paidbah mynta ki don hapdeng ka jingsohsat hynrei u la kyrpad ruh sha ki paidbah ba ki dei ban long kiba ïaishah shipor hadien ba bun snem ki la mad jingeh, da kaba pynthikna ruh ba tang hapoh khyndiat taiew yn sdang noh ïa katei ka kam. Kum ban shu pynkynmaw ba ïa u surok Nongpoh, Umden, Sonapur la dep ban buh mawnongrim ha ka 10 tarik Nohprah 2024, ba don kumba 20 kilometer ka jingjrong bad la mang pisa kumba 49.53 klur tyngka lyngba ka state scheme, katba na Umden sha Sonapur pat ba don kumba 38.6 kilometre la mang pisa kumba 47.20 klur tyngka lyngba ka PMGSY III.
