Kular u CM ban thaw ïa ka All Party Committee halor jingdawa Winter Capital ha Tura

Shillong, Lber 06 : Bun ngut bha ki MLA ki la ieng ban shim bynta ha ka jingïatai halor ka Resolution ba wanrah da u Nongïalam ka Liang Pyrshah, Dr. Mukul Sangma ban pynlong ïa ka Tura, West Garo Hills kum ka Winter Capital.
Na ka liang u Myntri Rangbah ka Jylla Conrad K Sangma haba jubab halor kane ka mat ïatai kaba la neh palat shi kynta tam u la kular ban thaw ïa ka komiti kaban bishar bniah ïa ka jingdawa Winter Capital ha Tura, West Garo Hills.
Kane ka jingkular jong u Myntri Rangbah ka la pynlong ruh ïa u Dr. Mukul Sangma ban mynjur ban weng noh ïa ka Resolution kaba u wanrah halor katei ka phang hapoh ka Dorbar Mangtyngka.
“Katkum ki kyndon kiba ju bud hapoh Iing Dorbar, nga kyntu ïa u Nongïalam ka Liang Pyrshah ban weng noh ïa ka Resolution naba ym ju don ka sorkar kaba mynjur ïa ka Resolution kaba wanrah da ka Liang Pyrshah,” ong u Myntri Rangbah da kaba bynrap ba watla kadei ka ishu kaba kham kyllain hynrei kin shong bad syllok lang.
“Namarba ngim lah ban mynjur ïa ka Resolution, nga lah pat ban thaw da ka komiti jong baroh ki party. To ngin sa ïa syllok lang bad baroh la ka long na Jaintia Hills, Khasi Hills bad Garo Hills, ki mat kiba pher bapher bad ruh ïa ki jingeh kiba lah ban don,” u la bynrap biang.
Haba pynpaw ba ki kam ba ka sorkar la leh ki kren kham jam ban ïa ki jingangnud jogn ki paidbah, u Myntri Rangbah u la kyntu ïa u nongïalam ka Liang Pyrshah ban weng noh ïa ka Resolution bad ong, “Baroh kine ki long ka nuksa kaba khraw ban pynïaid ïa kiei kiei bad ban wanrah ïa ka jingsynshar kaba kham jan sha ki paidbah. Kumta, ngi ïaid ryngkat bad ka jingthmu jong ka Resolution bad ngin sa don ka komiti halor kane.”
Nangta u ong ruh ba ka Liang Synshar kam lah satia ban kyrshah ïa ka Resolution namar ka long kyllain khyndiat bad katkum ka jingshisha ha kine ki 53 snem ym pat ju don ka Resolution ba wanrah da ka Liang Pyrshah kaban mynjur ha Iing Dorbar.Tangba u ong pat ba kane kam mut ba ym don ba sngewthuh ïa ka jingdonkam jong kane ka ishu.
Shuh shuh u ong ruh ba ka ishu jong ka Winter Capital kadei kaba baroh ki la pynpaw bad bun ki kynhun bad ki seng ki la wan ban kynduh ïa u. Nangta u ïathuh ruh ba u la dep ban kynduh ïa jan baroh ki seng kiba wan ban kynduh ïa u halor katei ka phang.
Da kaba pyntip ïa ki sienjam ba la shim ban pynbeit ïa kane ka ishu, u Myntri Rangbah u la ong, “Ki kam jongngi ki kren kham jam ban ïa ka ktien. Ngim ju ïaid kylleng bad kren shaphang kiei kiei kiba ngi kwah ban leh naba ngi skhem ban pyntikna ba ka roi ka pa ha baroh ki lïang kan wan ha ka jylla.”
U pyntip ruh ba ka sorkar jylal ka la pynlong ruh ïa ka jingïalang jong ka kynhun myntri ha kylleng ki bynta jong ka jylla, la ka long ha Tura, Jowai, Sohra, Resubelpara bad bynrap ba kumkine ki prokram ym lah ban pynshong da ka dor.
“Don ka daw haba ngi leh ïa ka. Ka jinglut kan don khlem artatien hynrei ka khubor kaba kham khraw ka long ban ïa don bynta lang baroh ban pyni ba baroh ha ka imlang sahlang bad ki riewshimet ki long kiba kongsan na bynta jongngi. Kutma ka jingpynlong ïa ka cabinet kylleng ki jaka kan bteng,” bynrap biang u Myntri Rangbah.
Shuh shuh, u Myntri Rangbah u la pyntip ruh ba naduh u snem 2018, ka sorkar ka la sdang ban buh ïa ki myntri sorkar ban long in-charge ha ki district bapher bapher bad ban leit jngoh ïa ki shnong kumjuh ban pynlut por ban sngewthuh ïa ki jingeh ba ki ïakynduh.
Ha kajuh ka por, u Myntri Rangbah u la pyntip ruh ba ka sorkar ka la rai ban pynlut 100 klur tyngka na bynta ban tei ïa ka Integrated Administrative Complex ha Tura, West Garo Hills.
“Ha kaba sdang ngi la pyrkhat ban pynlong tang kum ka ophis kaba rit hynrei lada phi peit ïa ka jingshna ïa ka complex ki don ki kamra na ka bynta u Myntri Rangbah, ki Myntri, ka cabinet room, kamra jong u Chief Secretary. Balei ngi leh ïa kane? Kane ka dei ka kam kaba nga mut ban ong ba ngi kwah ban pynjan shuh shuh ïa ka synshar khadar sha ki paidbah,” u la ong.
Lait na Tura, u Conrad u la ïathuh ba ka Integrated Administrative Complex kan sa don ruh ha Jowai, West Jaintia Hills bad Pynursla ha East Khasi Hills.
Kumjuh ruh, u la ong ba ka sorkar jong u ka la pynthikna ba ka jingtei ïa ka Raj Bhavan ha Tura kan long kan dep noh bad la plie ïa ka da ka President ka ri India.
Ha shwa ba un weng ïa ka Resolution, u Dr. Mukul u la ong, “Ka rukom pynkhreh jong nga ïa ka Resolution ka long ha kata ka rukom ba baroh ngin mynjur bad nga la jop ha kata.”
Shuh shuh u ong ruh ba u sngewthuh ïa kaei kaba u Myntri Rangbah u thmu ban leh bad na kata ka daw u kloi ban weng noh ïa ka Resolution.