Kular ka Irani ïa u bah Paul ban bei pisa ban tei ïa ki ICDS Centre ha palat 1500 tylli ki shnong

Shillong, Naitung 31 : U Myntri ka tnad Social Welfare ka sorkar jylla u bah Paul Lyndoh mynta ka Sngi Lah U Blei u la ïakynduh bad kyrpad ïa ka myntri sorkar pdeng ba peit ïa ka tnad Women and Child Development ka Smriti Zubin Irani ban bei pisa ïa ka sorkar jylla na ka bynta ban tei ïa ki ICDS Centre ha palat 1500 tylli ki shnong ha Meghalaya.
Haba kren sha ki lad pathai khubor na Delhi lyngba ka Video Conference u bah Paul u la ïathuh ba ka Myntri sorkar pdeng ka Irani ka la kular ban pyllait ïa ka fund ba 90% hadien ba ka sorkar jylla ka la kular ban pyndap 10 % khnang ban ïoh tei ïa kine ki ICDS Centre.
U la ïathuh ba palat 1500 tylli ki shnong ha Meghalaya kim pat don ki ICDS Centre namar ka thong jongka ICDS ka long ban ïarap bad kyrshan ïa ki khynnah kiba hapoh 6 snem ka rta da ki mar bam ba tei ïa ki met ki phad jongki.
U bah Paul ula ïathuh ba ka jingtei ïa kine ki ICDS Centre kan long ha ki bun bynta (Phase manner). Nalor kane u la ïathuh ba ka Myntri ka la kular ruh ba ka jingpyntreikam ia ka Supplementary Nutrition Programme (SNP) lyngba ka ICDS kan dang ïai bteng ha ka jylla Meghalaya.
Kham mynshwa ka sorkar pdeng ka la byrngem ban pynsangeh noh ban pyntreikam ïa ka SNP ha ka jylla namar ki tharai ba ka lah ban don ka jingpyndonkam bakla bad khamtam kiba bun kiba ïoh jingmyntoi kim pat don Aadhaar Card.
“ Haba nga shimti nyngkong ïa kane ka tnad kiba la don Aadhaar ki long tang 13 % hynrei naduh u Jymmang haduh u Jylliew kiba pyndonkam Aadhaar Card ki la kiew sha ka 95 % bad mynta la kot sha ka 97%” ong u bah Paul.
Shuh shuh u bah Paul u la ïakren ruh na a bynta ka tulop jong ki nongtrei Poshan kaba ym pat siew mynta la saw bnai bad halor kane ruh ka Myntri sorkar pdeng ka la kular ban pyllait noh ïa kane hapoh ar bnai. U la ïathuh ba shen yn sa thung kumba 2 haduh 3 ngut ki DPO. Ha kaba ïadei bad ka skhim Nirbhaya, u bah Paul u la ïathuh ba ka tnad shen kan sa phah ka jingtyrwa ban buh ïa ki jaka sah na ka bynta ki kynthei ha ki bynta khappud jongka jylla.