Kubur ka sorkar ba ka ju lehklet ïa ki nonghikai bad ïa ka jingtrei shitom jong ki

Shillong, Risaw 27: U Symbud Myntri Rangbah ka jylla u Bah Prestone Tynsong ha ka sngi Palei u la kubur ba ka ju don ka khep ba ka sorkar ka ju leh klet ïa ki nonghikai bad ïa ka jingsynïang kaba khraw kaba ki la noh sha ka imlang sahlang.
Haba kren ha ka jingplie ïa ka Approach Road bad ka Auditorium jong ka College of Teacher Education (PGT) u Bah Prestone u la ong, “Ki ju don ki khep ba ngi klet ïa ki nonghikai bad ka jingkhraw ka kam kaba ki trei, hynrei nga u Bah Prestone u long kumba u long mynta dei na ka jingdon ki nonghikai bad u Conrad Sangma u long kumba u long khlempep ka dei na ka jingtrei shitom ki nonghikai.”
U la ong ruh ruh ba na ka liang ka sorkar wat hapdeng ki jingeh kiba kum ka sorkar ki ïa kynduh hynrei kam ju ieh ïa ki nonghikai bad u ong ruh ba na ka liang ka sorkar ka angnud ba ha ki snem kiban dang wan yn kham pynjanai ïa ka jinglong ki jaka pule ym eh tang ha ka jigtei ïa ki Building hynrei ïa kiei kiei kiba ym paw shabr kum ka jingtei kata ka jingtbit ki nonghikai bad kiwei de.
U Myntri Rangbah haba ai jingkren ha kane ka sngi u la ong ba na ka liang ka sorkar kan pyrshang ïa kaba bha tam ban ïoh biang ïa ka nam ba la duh ka nongbah Shillong kum ka ktem ki jaka pule ba kynsai.
“Ban pynlong biang ïa ka Shillong kum ka ktem ki jaka pule kam dei ka kam kaba lah ban leh tang ha ka shisngi arsngi hynrei ka dei ka kam kaba da ki snem bad na ka liang jong ka sorkar ruh kan trei borbar ban kynjoh biang shata,” u la ong.
U la ong ruh ba ka jingeh jong ka sorkar ban ïarap ïa ki skul ha ka rukom kaba ki dei hok ban ïoh ka dei namar ka jingbun palat ki skul ha ka jylla.
“Lada nujor bad ka jylla Manipur kaba ka jingdon ki nongshong shnong ka dei malu mala bad ka jindon ha ka jylla jong ngi hynrei lada nujor ïa ka jingdon ki skul pat ka jylla jong ngi ka tam haduh laishah, bad ba phin tip ka tnat Pule Puthi ha ka jlla ka dei ka tnat kaba jwat bha ban bat ym tang na ka jingdon bun palat i skul hynrei na ka jingbun palat ki kyrdan ki nonghikai,” u la ong.
Shuh shuh u la ong ruh ba na ka liang ka sorkar kaba mynta ka pyrshang ban pynbha ïa ka jinglong ki skul bad ki jaka pule ha kaba na ka Cess kaba ju ïohlum na ki mar pohkyndew kaba la mang khnang ban pynlut na bynta ka pule puthi kaba ki sorkar kiba rim kim ju pyndonkam ha ki skul hynrei la pynlut pynban sha kiwei ki tnat. U la kam ba dei ha kane ka kynti kaba mynta ba ka Cess ba dei ban pynlut ha ka pule puthi la pynlut kumba dei hok na bynta kane ka tnat.
U la ong ruh ba kumba ka jylla ka dei ka jylla kaba ki nongshong shnong kiba bun ki dei kiba shaniah na ka rep ka riang na ka liang ka sorkar ka ju pyllut kumba 400 haduh 500 klur shisnem ha ka rep ka riang bad ki kam ri jingri.
U la bynrap ruh ba wat la ka jylla ka dei ka jylla nongrep hynrei na ka liang ka sorkar kam shong kli kti beit tang ha ka kam rep hynrei ka la peit jngai lupa ruh ïa ka lawei ki khun samla ha ki 10 snem ban wan da kaba thaw lad ba kin im kamai na kiba bud bah ki lad kum ha ka kam jngohkai pyrthei, ka lad ïohkam ha ki IT bad kiwei de ki lad kamai kiba ki samla kiba la nang la stad ha ki por ban dang wan kin im ja.
Ïa katei ka approach Road kaba la plie ha katei ka sngi la bei tyngka da ka PWD(Road), ïa ka Auditorium bad ki kamra klas da ka NEC bad ka jingpynbha ïa ka building ba la don lupa la bei tyngka na ka RUSA.