U Myntri Rangbah ka Jylla u Conrad K. Sangma ha ka sngi Balang u la ïakynduh ïa u Myntri ka Sorkar Pdeng uba khmih ïa ka tnat Social Justice and Empowerment u Dr. Virendra Kumar bad kyrpad ïa u ban tuklar lem na ka bynta ban ïoh tei ïa ka Sports Centre for Persons with Disabilities ha Meghalaya, ka ban sa ïoh pynlong ïa ka National Games ha u snem 2027.
Ka jingshimkhia jong u Conrad Sangma ban leit pynsngew sha ki tyndong skhor jong ka Sorkar Pdeng ka long ban dup pynurlong ïa ka jingshna ïa ki jaka ïalehkai kiba biang hapoh kane ka jylla shwa ban wan poi ka lympung ïalehkai kaba heh ha ka ri India.
Ka jinglut jingsep ban tei ïa ki jaka ïalehkai kan kot da ki spah spah bad ki hajar klur. Naei ka Sorkar Meghalaya kan ïoh ïa kane ka pisa lymda ka Sorkar Pdeng kam ïarap ban lem namarba ka jylla Meghalaya ka paw kum ka jylla kaba duk hapdeng kiwei pat ki jylla ka ri India.
Kumba ka long mynta, ngi donbok haduh katta katta ba ki don ki jaka ïalehkai ha ki shlem treikam bapher bapher hapoh ka jylla kum ka madan ïalehkai jong ka SAI ha NEHU, ka jaka siat suloi jong ki shipai ha GTC nalor ka rynsan ïakura bad kumba ka long mynta ka nongbah Shillong ka dang don tang kawei ka pung jngi ha Crinoline ïa kaba la shna pynbha mynta la katto katne snem.
Haoid, watla ka Meghalaya ka dang donkam shi bun ki jaka ïalehkai kiba biang hynrei ban shu pynlong lut tang ha madan Polo, ha Shillong, ha Jowai bad ha Tura kam pat biang satia namarba ka jinglut kan long kaba jur haduh katta katta.
Haoid, ki don ruh ki Indoor Stadium ba ki nongïalehkai bapawkhmat ha ka ri ki lah ban kilan met ha ki sngi ba ki wan sah lypa ban ïashim bynta ha ki lympung ïalehkai bapher bapher bad khlempep kine ki la long shisha ki jingkyrkhu ïa ka jylla. Toi, wat la ki long kiba rit hynrei ki la biang bha ban pyndonkam kum ki jaka kilan met.
Ka Sorkar ka la ithuh lypa ïa ka jaka kaba heh 40 akar ha Mawkhanu, Mawpdang, New Shillong Township (NST) na ka bynta ban shna ïa ka jaka ïalehkai sports hynrei tang hapoh ar snem ban tei kat ïa kane ka jaka ïalehkai kaba heh bad ka ban neh syndon shi junom kam long kaba suk. Namarkata la donkam ïa ka Sorkar India ba kan phaikhmat lem.
Ym lah ban len ba ka Sorkar Meghalaya ka angnud haduh katta katta ban pynshlur ïa ki nongïalehkai sports da kaba mynjur dang shen ïa ka Meghalaya Outstanding Sportspersons Direct Appointment Policy 2025 khnang ba ki nongïalehkai sports kiba ïoh khur takma ha ka lympung ïalehkai Olympics/Paralympics/Special Olympics, Asian games lane Asian para games, Common Wealth, lane CommonWealth Para Games, South Asian Games bad National Games kin dup ïohlad ban rungkam ha ki tnat treikam bapher bapher ka Sorkar Jylla.
Kane kan pynshlur shuh shuh ïa ki nongïalehkai ba kin trei minot bad duriap bha ha ka jingïalehkai ki ban pynlong na uwei u snem sha uwei pat u snem khnang ba shisien ka sngi kin wanrah ïa ka nam ka burom sha la ka jylla bad ba kin ïoh jingmyntoi ruh ha ka jingim jong ki shisien ka sngi.
Khlem da klet ruh ïa u synniang u bynhei jong ka Meghalaya Olympic Association kaba la trei shitom ban wad ïa ki khynnah na kylleng ki district jong ka jylla kiba don ïa ka sap ïalehkai sports ha ki liang bapher bapher. Da ka jingtrei shitom jong ka Meghalaya Olympic Association ki khynnah sha nongkyndong kiba don ïa ki sap ïalehkai ki la paw kum ki khlur ïalekai ka jylla hynrei ym kum ha ki por bad ki samoi ba la leit noh na ka jingbym ïoh rynsan ki shu kut noh tang ha ka jingphohsniew.
