Kren tyngeh u CEM ba i saitmet bad i-ngiew ka parkinglot jong ka MUDA ha Khlieh Iewduh

Shillong, Nailar 29 : U Chief Executive Member ka KHADC, Bah Pynïaid Sing Syiem ha ka sngi Ba-ar u la ong ba ka sorkar jylla haba ka ai wai ne ai pynïaid ha kiwei pat ïa ki parking lot ka la dei pat ban pyntikna ba kitei kiba pynïaid kidei ban shim ïa ka jingkitkhlieh ban pynneh ïa ka khuid ka suba.
Kane ka jingkren jong u kadei hadien ba ka KHADC ryngkat ki Magistrate bad heh pulilt kumjuh ka Hima Mylliem ki la leit ban jurip ïa ka Ïewduh baroh kawei bad ruh ïa katei ka jaka pynieng kali kaba don ha Khlieh Ïewduh ba pynïaid da ka sorkar jylla.
Halor kane haba kren bad ki lad pathai khubor hadien ka jingjurip, u CEM u la ong, “Haba aiwai dei ban don bad ki kyndon kein. Ym dei ban shu aiwai thylli suda khlem don ki jingbthah ne ki kyndon kiba biang. Halor kane, ngin sa thoh sha u Director ka Urban Affairs bad kumjuh sha ka MUDA ba la kumno kumno ïa kiba la aiti ka parking lot kidei ban don ki kyndon bad ka khuid ka suba dei kawei.”
Shwa kane, u Bah Pynïaid u la ong ruh ba ka jingwan jurip jong ki kadei hadien ba ki ïoh ka jingujor na ki paidbah nongleit nongwan, na ki shnong ba ym i shngaiñ shuh ban wan ha Ïewduh, na ka daw ba ki don ki jaka kiba long kum ki jaka riehtngen ki nongleh kam snïew.
“Haba peit ha Khlieh Ïewduh ha parkinglot jong ka MUDA don saw mala kiba ai jaka ieng ïa ki kali, hynrei don ki mala pat kiba ym i long shuh ban rung namar la dap da ktieh bad dum bha wat ha kapor mynsngi. Kum kine ki jaka ki khring ïa ki kam snïew bad nongleh kam snïew khamtam haba phai sha ka jingeh ba ka jylla ka mad haba ïadei bad jingkyrni u drok,” u la ong.
Shuh shuh u ong ruh ba ha kane ka juk ba bun ki samla ki ngat ha jingkyrni u drok kumta lada ka sorkar bad ka council kim peit lang shaei kan poi ka lawei jong ki samla.
“Kumta da ka jingsngewkhia ngi la khot lang ïa ki ophisar ka MUDA ba la kumno kumno hapoh shibnai arbnai dei ban weng noh ïa ki jingeh ha katei ka parkinglot ba kan don noh ka jingshai khnang ba ki nong rung nongmih bad nongset kali kin lait na ka jingshah lute. Halor kane na ka liang ki ophisar ki la pynpaw ba don ka projek ha ka smart city bad shen yn sa sdang pyntreikam noh ha u bnai ban wan,” la ïathuh shuh shuh u CEM.
U Bah Pynïaid u la ong ruh ba ki sngewkmen ba ka sorkar ka kular ban shimkhïa ïa katei ka parking lot kaba don ha syndah bad ka Hima Mylliem namar barabor ki kam snïew ba leh ha Motphran, ïewduh ki phet beit sha kitei ki jaka ban riehtngen.
Shuh shuh u la ong ruh ba ha katei ka jaka, ki kali kit dohkha naduh kiwei ki jylla ki ieng hangtei ban pynhap dohkha bad kumta ka um kaba mih jaw nangtei ka tuid lut sha ki jaka pynieng kali kiba don sharum kiba hap ha ka jingpeit jong ka Hima Mylliem.
“Kumta kum ïa kine kiei kiei ngi hap ban shimkhia namar kam dei ka jingkhuid jingsuba tang haba ngi peit bad itynnad ïa ki sawdong sawkun hynrei ruh haba khuid suba ngi ïa koit ïa khiah ruh bad kata kadei kaba donkam tam bad kane hi kan pynlong ïa ka jaidbynrïew kaba koit ba khiah bad kaba rïewspah,” u la ong.
Ha kane ka jingjurip la donlang ruh naduh ka Executive Member ka tnad Market, Kong Grace Kharpuri, EM ka tnad Development Bah Carnes Sohshang, Syiem ka Hima Mylliem Paiem Ainam Manik Syiem kumjuh ki Myntri ryngkat ki ophisar bad heh pulit bad kiwei kiwei.