Shillong, Naiwieng 15 : Haduh 185 ngut ki nongïalam na ki saw tylli ki party ba don ha Shillong North constituency ba kynthup naduh ka party BJP, NPP, UDP bad ruh na ka TMC ki la leit ban ai jingkyrshan noh ïa ka Congress ban pynkhlaiñ shuh na bynta ka elekshon jied nongmihkhmat kaban long ha u 2023.
Ka jingwan pynïasoh jong kitei ki nongïalam na ki party bapher bapher kadei da ka jingtreiborbah jong ki nongïalam ka Congress Shillong North hapoh ka jingïalam jong u Bah President Bah Pynshai Basaïawmoit bad Kong Meba Kharkongor, President Mahila jong ka Shillong City ryngkat u kyrtong ka party, Bah JA Lyngdoh.
Na ka party ki iathuh ruh ba kitei ki nongkyrshan jong ka BJP kiba wan ban kyrshan noh ïa ka Congress ki dei hapoh ka jingïalam jong u Bah F Marbaniang President Youth BJP, Bah P Chyne Secretary BJP bad Bah L Dkhar Vice President BJP. Katba ïa ka kynhun na NPP pat la wan ïalam da u Bah S Lyngdoh ba dei u nongïalam jong ka youth wing, nangta ka Adviser jong ka Women’s Wing Kong V Diengdoh bad kumjuh ka Assistant Secretary Women’s Wing Kong Rihun Lyngdoh
Kiwei pat ki nongïalam ba wan pynïasoh ki kynthup naduh u Subhodeep Das, Nehal Paul,
Aditya Roy, Siddharth Ghosh, Rajesh Roy, Yusuf Khan, Dipanjan Paul, Arsad Khan, Tipu Khan, Amit kumar nalor kiwei kiwei. Kitei ki nongïalam jong kitei ki saw party ki la pynpaw ba ka jingwan pynïasoh jong ki sha ka Congress kadei namar ki ïohi ba u kyrtong jong katei ka party u dei uba kham proh kham shemphang bad ruh uba don ka jingkyrmen ban jop.
Na ka lïang u kyrtong, Bah JA Lyngdoh pat u la pynpaw ba ka jingphaikhmat jong kitei ki nongïalam na kiwei pat ki party sha ka Congress kadei namar ki ïohi ba dei ha katei ka party ki don ki nongïalam kiba kynsai khamtam kum u Bah Pynshai bad Kong Meba.
