Shillong, Nailar 01 : Ka Congress ha Meghalaya ka la kob ba ha Shillong parliamentary seat hi dang kham lah u Ma Vincent H Pala ban bteng biang ïa ka kam kum u MP ka Lok Sabha hynrei haba ïadei pat bad ka rilum Garo ki dang wad mynta ïa u kyrtong uba biang ban aireng ha katei ka elekshon kaban sa long shen ha u snem ban wan.
“Ha Shillong hi ka la shai ba u Ma Vincent Pala un dei u kyrtong ka party hynrei ban ïaid beit ka kam kum u kyrtong hap ban bud ïa ki kyndon ba la buh ban thep kyrteng,” ong u Working President ka Meghalaya Pradesh Congress Committee, Bah PN Syiem haba kren bad ki lad pathai khubor.
Nalorkata, u ïathuh ruh ba na bynta ka rilum Garo pat ki shaniah ha ki nongïalam na katei ka thaiñ ban leh ïa kaba donkam. “Ka shong mynta ha ki nongïalam na rilum Garo kum ka Deborah Marak, MLA barim bad kiwei kiwei ban jied ïa u kyrtong bad sa phah pat sha ka All India Congress Committee ban mynjur,” u la bynrap biang.
Utei u rangbah uba dei ruh u Deputy CEM ka KHADC u la kob ba ki jingjia kylleng ka ri, ki kdew shai ba ki paidbah mynta ki la phaikhmat sha ka Congress ha kane ka elekshon MP kaban wan. “Nga ïohi mynta ki paidbah ha Ri India ki la sngewthuuh ba dei tang ka Congress kaba dei ka party kaba lah ban wanrah ïa ka jingïalong kawei ha ka ri. Kane ka lyer kan ïarap shibun ïa ka party ha ka jylla ruh,” u la ong.
Nalorkata, u ong ruh ba ha Parliament, barabor hi donkam ïa ka party kaba don ïa ka sur lah ban dei 50 ne 100 ne 200 ngut ki MP. “Hynrei ban shu leit kumto kan ym don jingktah ïa ka Jaidbynriew namar mynta ban ïa kren ban ïada ïa ka Jaidbynriew, donkam ki party kiba khlain ha baroh kawei ka ri ban pynurlong,” la bynrap biang u Bah PN Syiem.
Shwa kane, utei u heh Congress u la ong ruh ba lada kren naduh ba ki ïoh ïa ka jylla ba pura, dei ka Congress lyngba ka Indira Gandhi kaba la ai sbun mynsiem ïa ka jylla. U la ong ruh ba u Rajiv Gandhi kum u Myntri Rangbahduh, ha ka por ba wanrah ban pynkylla ïa ka 73rd Amendment ban pyntreikam ïa ki Panchayat, ha kato ka por u Rajiv u la ong ba ïa ka thain shatei lam-mihngi jong ka Ri ym donkam ïa ka Panchayat namar la don kiwei pat ki ain ban ïada.
