Pyndait noh da ki jaka thew kali ban ïoh bat ia ki trok ba kit palat pud, bthah ka HC

Shillong, Nailar 01 : Ka Meghalaya High Court ha ka sngi Nyngkong ka la bthah ban pyndait da ki jaka thew kali khnang ban ïoh bat ïa u dewiong ba khaïi beain ha ki trok kiba kit palat pud ha ka jylla.
Haba bishar halor ka PIL halor katei ka phang, ka Division Bench ka ong ba ki kyrmen ba katto katne na kitei ki jaka thew yn lah ban pyndait noh ha shwa ba yn shong bishar biang ïa katei ka mat bad na ka liang ki nongujor bad ka jylla ruh ki dei ban kdew haei ba ïa kitei ki jaka thew la dep ban pyndait bad ha kiei pat ki jaka ba dang donkam ban pyndait.
“Ka jingthmu jong kane ka long ban pyntikna ba ka jingkhaii ïa u dewiong beain ha ki trok kit palat pud dei ban ïoh bat ryngkat bad ka mar kaba la kit palat ïa kaba la buh ban kit ha ki surok National bad State Highway,” la ong da kaba bynrap ba la bthah ruh ïa ka jylla ba kan peitngor halor katei ka bynta khnang ba yn dup lah ban pynsangeh noh ïa ka khaii beain ïa u dewiong ha ka jylla.
Ïa katei ka PIL la ujor da u nongtrei monsngewbha u Tennydard M Marak pyrshah ïa ka jingbym lah jong ka jylla ban tehlakam ïa ki kali ba kit palat pud kiba ïaid ha kylleng ki bynta jong ka Meghalaya.
Ka report bala phah da ka jylla ha ka 19tarik Naitung, 2023 ka kdew ba 23 tylli ki weighbridge ki la don ha ka jylla bad ki la treikam pura bad la pyndonkam ruh ïa ki man ka sngi.
Ka jylla ka pyntip ruh ba ha shwa ba kan mih kane ka jingbthah, la pynkhreh ban pyndait ïa kitei ki jaka thew bad yn pyni da ki kam hapoh 10 sngi naduh ba pynmih ïa ka report.
Halor ka jingkylli jong ka Ïing Bishar ïa ka jylla ïa ka jinglong jingman kaba ïadei bad kitei ki weigh-pad, ka jylla ka pyntip ba ym pat phah satia ban pynpoi ïa ki tiar.
Kumta, ka la buh jingkylli kumno wat hadien ba la kdew ha ka report kaba 19tarik Naitung hynrei ym pat ïohi dak ban pyndait ïa kitei ki jaka thew kali, ong ka Bench.
“Ka jylla ka la ong ba san jur ki weigh -pad la tyrwa ban phah pynpoi bad kumta la kyrmen ba kitei ki weigh-pad yn pyndait bad pyndonkam noh ha ki artaïew naduh kane ka tarik,” ka la bynrap biang.