Shillong, Nailar 01 : U Myntri ka tnad Pule Puthi jongka jylla u Rakkam A Sangma, ula pyntip ba ïa ka kam ba ïadei bad ka jingpyntreikam ïa ka National Education Policy ba thymmai, yn sa rah ïakren ha ka jingïalang ban wan jong ka Meghalaya Higher Education Council (MHEC) ka ban long la 10 tarik Nailar.
Ha kajuh ka por, ka Sorkar Jylla ka la bthah ïa ka North Eastern Hill University (NEHU) ban khot pynlong ïa ka jingïalang jong baroh ki Khliehduh jong ki tnad Pule ka Jylla ban ïakren halor ka jingpyntreikam ïa ka NEP.
Haba iakren bad ki lad pathai khubor hadien ka jingïalang, u Rakkam u pyntip ba ha kane ka jingïalang ka MHEC, kaba un pynïaid, yn wan ïashim bynta ruh da ki Heh ka NEHU bad ki nongpynïaid jong ki jaka pule.
“Ngin ïakren bniah halor ka NEP. Ngin sngap ruh ïa kaei kaba kiba bun ki don ban pynpaw (NEHU bad college)” ula ong.
U Rakkam ula pyntip ba ka Sorkar ka la dep pan ïa ka jubab da ka jingthoh na ki jaka pule hapoh ka Jylla ba kin pynpaw la ki la kloi ne em ban pyntreikam ïa ka NEP hynrei kiba bun ki la pynpaw ba kim pat long satia kiba la khreh ban pyntreikam mar mar ïa kane.
U Rakkam ula ïakynduh ruh ïa ka kynhun ki Nongïalam ka Hynniewtrep Youth Council, kaba la kyrpad ïa u ban tuklar lem halor ka jingrai kyrkieh jong ka NEHU ban pyntreikam ïa ka NEP naduh u Nailar 2023.
Ula ong ba ka NEHU kan ïaid beit shakhmat ha ka ban pyntreikam ïa ka NEP kat kum ka jingpynbna jong ki bad ka Sorkar Jylla kam don bynta eh hangne haba bynrap “Hynrei, ngi la dep kyrpang ïa ki (NEHU) ba kim dei ban pynbor ïa ki jaka pule haba pyntreikam ïa ka NEP”.
Nalor kane, u Myntri ula pyntip ba ka Sorkar kala kyntu ruh ïa u Vice Chancellor ka NEHU ba un lum ïa ka jingïalang bad ki Khlieh pynïaid jong ki tnad pule bad ban ïatai sani bad ban ailad jynsur ruh ïa ki jaka pule ha ka ban pyntreikam ïa ka NEP.
Haba pynpaw ba ka Jylla Meghalaya kam dei ban shah ïeh shadien, ula ong “Ngi don ka lynti ban jam shakhmat. Hooid ngi don ïa ki jingeh hynrei lada ka Meghalaya ka shah ieh, kan ym long satia kaba sngewtynnad”.
Haba kren halor ka rai jong ka Meghalaya College Teachers Association (MCTA) ban boycott ne sangeh leit shim klas ïa ki 1st Semester ban pyrshah ïa ka rai jongka NEHU halor ka NEP, u Rakkam ula ong “Ngan da kmen eh lada ka MCTA ka don ïa ka jingïalang bad ki Khlieh pynïaid jong ki jaka pule ban ïakren bad wad ïa ka lynti ban jam shakhmat”.
Kat kum ka jingong jong u, ki samla pule kim dei ban shah ktah naba ki dei kiba ka Sorkar ka phaikhmat bha.
Haba mynjur ba bun ki jaka pule kin shah ieh shadien lada pyntreikam ïa ka NEP da ka hybrid mode, u Rakkam ula ong “Kane ka dei ka jingshisha naba ha ka hybrid mode, katto katne ki college kin shah ieh shadien bad ym don satia kawei ka college kaba kwah ïa kane hynrei lada baroh ki rai ban nym shah ieh, ka Jylla baroh kawei kan shah ieh ïa kaba ngin hap ban jied. Namar kata, ai ba ki khlieh jong ki jaka pule bad ka NEHU kin ïakren sani bha ïa kane ka kam. Ka lawei jong ki samla pule ka kham kongsan ha baroh ki jaka pule”.
Halor ka jingdawa ka HYC ban don noh ïa ka State University, u Myntri ula ong ba haba tip ïa ki jingeh jong ka Jylla bad khnang ban lah btin lynti shakhmat ïa ka kam pule dangle ka Jylla, ka Sorkar ka la dep ban rai ha ka ban wanrah ïa ka State University ba la tip kum ka Captain Williamson Sangma State University, ha Tura, West Garo Hills District.
Ula ong ba ka HYC ka la dawa sa kawei ka State University ka ban don ha Nongbah ka Jylla haba kular ba un sa rah ïakren ïa kane ka kam bad u Myntri Rangbah ka Jylla Conrad K Sangma.
