Kmen u MLA barim ka Umroi ba urlong 2 tylli ki surok ka Raid Madan Kyrdem ba la kyrpad naduh u 2021

Nongpoh, Ïaiong 14: Ka long ka jingkmen kaba khraw ïaki shnong ka thaiñ Raid Madan Kyrdem hadien bun snem ka jingjynjar haka leit ka wan, mynta ka kynti ba 2 tylli ki surok ba kongsan ba kynthup ïaka surok Bhoirymbong-Mawbseiñ ba jngai kumba 14km bad ka surok na Nongthymmai-Khyndewso ba jngai kumba 10km kila ioh ka jingmang pisa kaba haduh 17.88 klur ban siang rong bad pynbha ïa kitei ki surok naka Ministry of Rural Development jong ka sorkar India.
Naka liang u Bah George B Lyngdoh MLA barim ka Umroi u la pynpaw ruh ka jingsngewkmen kaba khraw haka rynsan Twitter ha kaba u la pynpaw ruh ba ka jingioh ïa kitei ki surok ka dei ka jingkyrkhu ïaki paidbah naka jingshimkhia bad ka jingkyrpad jong u naduh u snem 2021 sha ka Ministry of Rural Development ba dei ha kane ka kynti ba ka jingangnud jong ki paidbah ban ioh noh da u surok ba thymmai kala urlong.
Naka liang u Bah George B Lyngdoh u la ai ruh ka jingkhublei ïa ki ophisar ka tnad PWD bad ka Ministry of Rural Development kiba la shimkhia ïa katei ka kam kumba ki paidbah ha katei ka thaiñ kila mad jingeh shisha palat 20 snem haka leit ka wan namar ka jingjot rathai bad ka jingsniew jong u surok, bad katei ka jingmang tyngka ban shna ïa kitei ki surok kan long ka jingkyrkhu bad ka jingkmen ïaki paidbah bad kyrmen skhem ruh ba ka kam kan sdang noh shen naka bynta ka jingmyntoi jong ki paidbah.