Kmen ki nongrep Mawkynrew ba pynshai ka Farmer’s Front bad u MLA halor ka ishu nongrep

Shillong, Naitung 03 : Ki nongrep na kylleng ki shnong jong ka Mawkynrew constituency ki la ïoh ban pynpaw markhmat ha ki nongïalam jong ka NPP Farmer’ Front, halor kiba bun ki jingeh ba kum ki nongrep ki kynduh na ka por sha ka por.
Ïa kane, ki nongrep ki la pynpaw ha ka jingïalang kaba la lum da ka NPP Farmer’s Front ryngkat u MLA ka thaiñ Bah Banteidor Lyngdoh ha kane ka sngi Balang ha Iing Dorbar Shnong Maw-u-Sam.
Na ka liang ki nongïalam ka Farmer’s Front kynthup naduh u Bah HM Shangpliang nangta na u Secretary Bah Egenstar Kurkalang bad kumjuh na u MLA ka Mawkynrew Bah Banteidor haba kren ha katei ka jingïalang ki la pynshai ruh haba ïadei bad ka dawai sboh kaba dei ka bynta kaba kongsan bha na ka bynta ki nongrep ha katei ka thaiñ.
La pynshai ruh ba ïa kane ka dawai sboh ki la don bun ki nong Mawkynrew kiba la ïoh laisen ban suplai ha ka thain bad kumta ïa kane kin sa pynpoi sha baroh ki paidbah kiba kwah bad donkam ïa ka.
U Bah HM Shangpliang haba pynshai halor ka skim CM Assure u la ong ba kane kadei ka skim kyrpang na bynta ki nongrep synsar ban ïarap ïa ki haba ka dor jong u synsar ka hiar. U kubur ruh ba kadei ka jingshisha ba ki nongrep ki ud ba ka sorkar ka lah ban shim tang 800 kilo u synsar namar u synsar uba sah pat u don da ki hajar kilo.
“La pyntip shangi ba bun ki paidbah kim pat tip shaphang kane ka skim bad don ruh kiba kyrpad ba ka sorkar kan shim kham bun u synsar bad ruh ban kyntiew shuh ka dor khnang ba ki nongrep kin ym duhnong,” ong u Bah HM Shangpliang ha ka jingïalang.
U la ïathuh ruh ba katkum ka dor synsar ba ka sorkar ka shim, ka dor u Grade A ka long 55 tyngka shi kilo, katba ïa u Grade B pat ka long 40 tyngka shi kilo bad ïa u Grade C pat ha ka dor ba 30 tyngka shi kilo.
“Halor kane, ngi la rai ban rah sha ka sorkar ban pynsngew ïa kane ban kyrpad ban shim kham bun kilo shuh u synsar bad ruh ban kyntiew kham heh ïa ka dor,” u la bynrap biang.
Ha kajuh ka por u la ïathuh ba ka la don ka jingud halor ka jingslem palat ban rejistar. Kumta u la ong ba na ka liang ka Front kan sa leh kham kloi noh na ka bynta ban rejistar ïa ki nongrep khnang ban ïoh shibun ki jingmyntoi na ka bynta ka rep ka riang ha ka jylla.
Katba na ka liang u Bah Banteidor pat u la pyntip ba na ka liang ka party ryngkat ka jingïatrei lang bad ki nongrep na ka thain Mawkynrew kin sa ïa kynduh biang ban pynsngew pat ïa ka jingeh ba ki nongrep na ka thain ki kynduh haduh shkor jong u Myntri Rangbah da ïa trei ryngkat ryngkat bad ka Farmer’ Front.
Ha kane kajuh ka sngi, ka Farmers Front ka la pynskhem ruh ïa ki nongkitkam jong ki distrik na bynta ki disrtrik jong ka rilum Khasi ryngkat ka jingbthah pat ba kin thaw ïa ka komiti ha ki block kiban don ha man la ki constituency khnang ba kin lah ban peit pat ïa ka jingeh jong ki nongrep.
Nalorkata, la pyntip ruh ïa ki kyrteng jong ki nongkitkam jong ka NPP Farmer’s Front jong ka Mawkynrew Block.