Dawa ki paidbah da ka surok Kyrshai-Langpih ban pynjan ïa ki shnong khappud

0

Nongstoiñ, Naitung 03: Haba ïohi ïa ka jingkyrkhu kaba ki paidbah Rambrai mynta ki ïoh lyngba ka surok kaba bha naduh Nongstoiñ, ki paidbah nongshong shnong jong ka thaiñ Kyrshai ba kynthup ïa ka Nongumbah, Darephang, Nongspung bad kiwei kiwei kiba dei ki shnong kiba don ha khappud bad ka jylla Assam, ki pynpaw ka jingangnud ban ïoh ki surok kiba bha, namar haduh mynta ym pat don satia ki surok kiba biang naduh kitei ki thaiñ haduh Rambrai bad Langpih kiba dei ki Headquarter jong ki.
Haba kren sha ki lad pathai khubor u bah P.Syiem uwei na ki riew rangbah na ka shnong Kyrshai, u la ong ba ka surok hi ka dei u budlum ïa ka ïoh ka kot ki paidbah. Hynrei, ka jingbym don ïa ki surok kiba biang na katei ka thaiñ shaduh Rambrai bad Langpih, ka la buh jingeh haduh katta katta ïa ki paidbah wat tang haba ki donkam ban ïakynduh ïa ki nongsynshar hima.
U la ong ruh ba naduh Kyrshai haduh Rambrai, ka la don ka surok ba ki trok kit dieng ki ju ïaid. Hynrei ki lah ban ïaid tang ha ka por tlang bad ha ki por lyiur pat kim lah ban ïaid namar ki thiep kiba jrong bad kim lah ban kiew. U la ong ruh ba ka jingpyntrei ïa ka surok na Nongstoiñ Rambrai haduh Kyrshai ka long tang 37 kilomitar, katba ka jingjrong jong ka surok na Nongstoiñ haduh Kyrshai ka don kumba 70 kilomitar tam.
U bah Syiem u la ïathuh ruh ba na Kyrshai haduh Langpih pat lada dei kiba khlaiñ ban ïaid kjat ka shim por san haduh Hynriew kynta. U la ong ruh ba ka jingleh klet jong ka sorkar jylla ban pynpoi surok ha katei ka thaiñ naduh ki por ba mynshuwa, ka pynlong ïa ki paidbah nongshong shnong kiba don kham shakhmat ïa ka Kyrshai.
Kine ki shnong ki kynthup naduh ka Ïew Ukiam ter ter haduh Borjhar kiba don harud ka surok ban leit sha Chaygaon. U la ong ba bun ki kham sngew tynnad bad longtrai shnong ha Assam ban ïa kaba don ha Meghalaya, namar ki kham ïoh shibun ki jingmyntoi na Assam ha ki liang baroh. U la ong ruh ba wat la katta ruh ki jingïarap na Meghalaya kum ka jingpyntrei ïa ka skhim MNREGS ki ïoh kumba ïoh kiwei.
U la ong ruh ba ki paidbah jong katei ka thaiñ haba ki donkam ban leit sha Nongstoiñ na ka bynta ki kam kiba ïadei ba ki ophis sorkar, ki hap ban leit haduh Chaygaon bad hiar sha Boko shaduh Hahim Athiabari haduh Riangdo bad ha kine ki sngi tang na Athiabari haduh Riangdo, ka shim por haduh saw kynta ïa ki kali ban ïaid namar ka jingsniew palat ka surok.
U la ong ba lada ka sorkar ka pyntrei ïa ka surok na Nongstoiñ shaduh Kyrshai ha ka jingjngai kaba tang 37 kilomitar, kam pat don jingmut satia bad kat haduh ba kan da pyntrei ïa kaba dang sah lei lei ym lah ban tip sa hadien katno phew snem kan lah ban pynurlong.
U la ong ba lada ka sorkar ka shimkhia ka la dei ban pan jingïarap na ka sorkar pdeng ban shna surok na Kyrshai shaduh Langpih, khnang ba ki paitbah kin lait na ka jingeh ba ki la mad ha baroh ki snem.

Leave A Reply

Your email address will not be published.