Shillong, Risaw 20: Ka Meghalaya State Olympic Association (MSOA) ryngkat bad ka tnat ba dei khmih ïa ka kam ïalehkai hynne ka Sngi Thohdieng ka la ïoh ban lumlang ïa baroh ki nongïalehkai ki ban sa mihkhmat ha ki kyrdan lehkai bapher bapher (Event) ha ka lympung lehkai National Games lyngba ka “Sent Off” program ban kitbok bad ai mynsiem khadduh ïa ki shuwa ba kin mih na jylla ban leit sha Goa.
ïa kane ka prokram la sdang ha ka por 4 baje janmiet ha State Convention, ha kaba la ïa don ryngkat baroh ki nongïalehkai bapher bapher, ki coach lem bad ki support staff.
Ha kane ka sngi la ïa donryngkat u Bah Shakliar Warjri, Myntri jong ka tnat Sports & Youth Affairs ka sorkar jylla kum u kongsan, ka Kong Isawanda Laloo- Director jong ka Sports & Youth Affairs, u Vujay Kumar-Commisioner jong ka tnat ïalehkai, u Bah Hamlet Dohling-President jong ka MFA u ba dang shah jied dang shen, lem bad ki dkhot nongkitkam jong ka MSOA.
Haba ai jingkren ha kane ka sngi, na ka liang jong ka Kong Isawanda Laloo (Director jong ka Sports & Youth Affairs), ka la ai khublei ïa baroh ki nongïalehkai kiba la ïadonryngkatlang ha kane ka sngi bad ïa ka MSOA kaba la trei shitom ban jied ïa kine ki nongïalehkai ki ban sa leit shimbynta sha katei ka rynsan ïalehkai kaba heh jong ka ri bad ka la pynpaw ïa ka jingsngewsarong na bynta ki nongïalehkai kiba la khur takma ha ka 34th East Zone Junior Athletics Championship, ha Kolkata bad kyrmen ha kane ka National Games ha Goa kin wanphai ryngkat bad ka burom.
Na ka liang jong u Bah Shakliar Warjri u la ai khublei ïa baroh ki nongïalehkai kiba la shah jied ban mihkhmat ïa ka jylla sha katei ka National Games. Shuh shuh, u la ai khublei ruh ïa ka MSOA bad ïa baroh ki Association kiba la ïatreilang ban pynthikna ba ka jylla kan nang ïai kiew ha ka liang jong ka Sports.
“Ka sorkar ka la trei shitombha ban wanrah ïa ki prokram bapher bapher ban kyntiew ïa ka Sports hapoh ka jylla ban sei madan ïa ki nongïalehkai kiba kynsai kiba lah ban wanrah burom ïa ka jylla, bad nga ngeit skhem ba ka jingïatreilang bad da ka jingtrei shitom jong ki nongïalehkai ki lah ban khur takma na bynta ka jylla” la pynpaw u Bah Shakliar.
Ha kane kajuh ka sngi, na ka liang jong ka MSOA ka la ïoh ruh ban pyni paidbah ïa ka ‘track suit’ kaba la pynkhreh kyrpang na bynta ki nongïalehkai sha katei ka National Games. Ka kynhun ki nongïalehkai ka jylla kin sa mih ban leit sha Goa mynta ka sngi, ka 21 tarik Risaw, 2023.
Kumba ka paw na ka liang jong ka Meghalaya State Olympic Association (MSOA), ka don jingkyrmenbha mynta ka kynti ba ki nongïalehkai kin khur khambun ki takma na katei ka National Games khamtam eh ha ka phutbol.
