Ha u snem 2020, ka sorkar pdeng ka la thaw da kawei ka National Educatoon Policy ban pyntreikam ha baroh ki skul, ki kolej bad ki skul bah jong ka ri baroh kawei. Ka jingthmu jong ka sorkar haba wanrah ïa kane ka Polisi thymmai ka long ban nang pynbha bad kyntiew shuh shuh ïa ka pule puthi jong ki khynnah skul bad ki samla pule da kaba wanrah ïa kiei kiei kiba thymmai bad kiban kham ïarap ïa ka pule puthi ha ka ri.
Ha Meghalaya, hadien lai snem ba la wanrah ïa kane ka Policy, la ïohi na ka liang ka skul bah North Eastern Hill University (NEHU) ka la rai ban pyntreikam noh naduh ka snem pule lane ka academic year mynta u snem 2023- ’24, ka ban sdang naduh ka 1 tarik u Nailar 2023.
Hynrei ïa kane ka jingpynbna ka NEHU ban pyntreikam noh ïa ka NEP 2020 mynta hi snem la ïeng pyrshah jur da ka Synjuk ki Nonghikai College ha jylla kata ka Meghalaya College Teachers Association (MCTA) da kaba ong ba kadei ka rai kaba la shu leh kyrkieh khlem da ïa mynjurlang ki College kiba la affiliate bad ka NEHU.
Na ka liang u Vice Chancellor ka NEHU, u Prof. PS Shukla ha ka sngi ba pynbna ban pyntreikam noh ïa ka NEP 2020 lyngba ki lad pathai khubor, kata ka 19 tarik u Naitung 2023, u la ïathuh ba ka skulbah ka la dep phah da ki shithi sha baroh ki jaka pule kiba la ïasoh ne hap ha ka jingkhmih jong ka NEHU ban pyntreikam noh ïa ka naduh ka 01 tarik Nailar 2023.
La pynshai ba lyngba ka NEP 2020, ka NEHU kan pyntreikam ïa ka Four-Year Undergraduate Programme (FYUP) bad kan pdiang ruh ïa ki jingpynrung thymmai ki samla pule da ka ba pdiang ïa ka Certificate jong ki Diploma bad ka Degree haba kut jong ka First, Second bad Third year.
U Prof Shukla u la ïathuh ba ka NEHU ka la dep ban pyntreikam ïa ka NEP 2020 na ka bynta ki kyrdan Post Graduate (PG) na bynta u snem 2022-2023 bad naduh 1 tarik Nailar 2023, ka NEHU kan pyntreikam ïa ka NEP 2020 na ka bynta ki kyrdan pule Under Graduate (UG). U VC u la ïathuh ruh ba ka skulbah kam pat ïoh ïa ka jubab haba ïadei bad ka shithi ba la phah ban pyntreikam ïa ka NEP bad ki don katto katne ki College kiba pynpaw ka jingeh ban pyntreikam ïa ka. Hynrei na ka liang ka NEHU ka la bthah ïa ki ban pyntip, balei kim lah ban pyntreikam khnang ba ka NEHU kan lah ban kner jingïarap sha kum kita ki College.
Nalorkata, u la ïathuh ba ha ki sngi ban wan kino kino ki College ki bym kot bor ban pyntreikam kin pyntip khnang ba na ka liang ka skulbah kan ïaleh katba lah ban kner jingïarap ban pynthikna ba ka jingpyntreikam ïa ka NEP 2020 ha Meghalaya ka long kaba seisoh.
Katba na ka liang ka MCTA pat ka la ong ba ka jingpyntreikam ïa ka NEP 2020, kadei kaba la shu rai hi da ka NEHU namar ba ha ka jingïalang jong ka Adacemic Council kaba 110, ha kaba ka MCTA ruh ka don ki dkhot ha kane ka Council, ym shym la shim kano kano ka rai ban pyntreikam noh ïa ka NEP 2020 naduh mynta snem, pynban ha kane ka jingïalang la rai ban ieh shuwa ïa ka jingpyntreikam, hynrei ban shna shuwa ïa ki Curriculum, ki Syllabus bad ka jingpynkhreh ruh jong ki College bapher bapher ban pyntreikam noh ïa ka NEP 2020.
Ka Synjuk ki Nonghikai ka la pynpaw ba ïamynta hi ki College kim pat long kiba la khreh, namar ba ka NEHU ka la shu pyntreikam kyrkieh, ha kaba kiba bun ki College kim pat biang ki Nonghikai ban sdang noh ïa kane ka Polisi kaba thymmai. Ka MCTA ka la rai ruh ba naduh ka 1 tarik u Nailar 2023, ka sngi ba pyntreikam ka University ïa ka NEP, baroh ki dkhot kata ki nonghikai ba don ha kane ka Synjuk kin nym shim klas ïa ki First Semester ha baroh ki Subject/
Lyngba kane, sa shisien pat ki samla pule kin mad jingeh namar ka jingïatyngkhuh hapdeng ki Nonghikai College bad ka NEHU. Ka sorkar jylla ruh kadei ban tuklar namar la sngewthuh ba ka la phah ka jingthoh sha ka Univeristy hadien ba ka la ïoh jingtip ba bun ki College kim pat long kiba la pynkhreh ban pyntreikam ïa kane ka Education Policy jong u snem 2020. Kan long kaba bha shibun lada ka NEHU, ka MCTA bad ka sorkar jylla ki ïapynbeit kloi, khnang ba kan nym long ka jingduh ïa ki Samla pule.
