Kim ju heh tyngam ha Motphran ne Iewduh hynrei u wanrah da ka Sixth Schedule ban ïada ïangi
Dap 64 snem ka jingkhlad u Kpa ki District Council
Shillong, Risaw 27 : Kum ka dak ban kynmaw burom ïa ka lyngkhuh sngi ïap kaba 64 jong u Kpa ki District Council, na ka lïang ka Rev JJM Nichols Roy Memorial Committee ryngkat ka jingïatrei lang bad ka Khasi Hills Autonomous District Council ha ka sngi Thohdieng ka la pynlong ïa ka jingïakob ïa tyrko ha Khasi National Dorbar Hall ha kaba bun tylli ki college ki la wan ban shim bynta.
Shwa ban sdang ka jingïakob, na ka liang u MDC ka thain ba dei ruh u Deputy Chief Executive Member ka KHADC, Bah Pynshngaiñ N Syiem u la ong kiwei ki heh tyngam ha Motphran ne ha Iewduh hynrei u Rev JJM Nichols Roy pat u ïakhun na bynta ban ïada ïa ka jinglong tynrai ki nongshong shnong ka jylla da kaba pynïoh ïa ka Khyrnit kaba Hynriew.
“Khlem ka Khyrnit kaba Hynriew, ym don shuh ka ai jait Kmie, long trai ka khyndew ka shyiap lane ha ka synshar khadar ruh. Kumta, mangi pat ha ka jaka ban ïaroh ïa kum kitei ki Rangbah kiba wanrah ïa ka stieh ban ïada ïangi hynrei ngi ai ka jingïaroh ïa ki heh tyngam,” ong u Bah Pynshngaiñ.
Shuh shuh u ong ruh ba ka jingmih ki District Council ha baroh ki jylla ka thain shatei lam-mihngi kadei da ka jingïakhun jong u Rev JJM Nichols Roy hynrei bun kim tip satia ïa kata.
La ïoh ruh ïa ka jingkren na u Chairman ka Rev JJM Nichols Roy Memorial Committee, Bah Ransom Sutnga uba la pynkynmaw ba don ki nongïalam kibym sngewthuh ïa ka bor jong ka Khyrnit kaba Hynriew ha kaba ki la iehnoh wat ïa ka shuki ba ki don ha ki por ba la dep.
La ïoh ruh ïa ka jingkren na u Secretary Governing Body, JJM Nichols Roy College, Dr. L Roy uba la kren bniah bha halor katei ka bynta.
Na ka liang u Bah S Kharsyiemlieh, Retd Judge jong ka District Council Court, KHADC haba kren kum u Moderator shwa ban sdang ka jingïakob u la pynkynmaw ba khlem ki District Council yn ym don Syiemship ne Hima bad wat ki jaka ruh yn ym lah ban long trai da ki riew shimet kumba long mynta.
Ha ka kylla kaba bud pat ka jingïakob ka long kaba shongshit bha ha kaba ki samla pule na ki college bapher bapher ki la sei la ki jong ki nia ki jutang ban pynksan ïa ka nongrim.
Ia katei ka rynsan ia kob la wan ban bishar da ki Professor na ka skulbah NEHU bad ruh na kiwei pat ki jaka pule kynthup ruh u President barim ka HYC.