Shillong, Naitung 20 : Ka kynhun myntri jongka sorkar jylla ha ka sngi Palei ka la rai ban kyntiew noh ïa ka dor diesel da 50 naïa nangne shakhmat.
Haba pyntip ïa kane ha ki lad pathai khubor hadien ka jingïalang jong ka kynhun Myntri, u Myntri Rangbah ka jylla, Conrad K Sangma u la ïathuh ruh ba katei ka rai ba ki shim kadei hadien ba ki lap ba ka dor jong ka diesel ha Meghalaya bad Assam ka la ïapher bun bha.
Katkum ka jingïathuh jong u, ka dor diesel ha Guwahati ka long 90.33 tyngka katba ha Khanapara, Ri Bhoi pat ka dor ka long 84.10 tyngka shi litar, kaba mut ba ka dor ka la ïapher haduh 6.23 tyngka shi litar tang hapdeng Khanapara bad Guwahati.
“Kumta, da kaba buh hakhmat na bynta ka jinglum khajna ha ka jylla, ngi la rai ban kyntiew noh ha ka kylla ba nyngkong da 50 naïa,” u la ong haba kren bad ki lad pathai khubor.
Shuh shuh u ong ruh ba watla ka don ka jingpynkiew dor, kin buh hakhmat ba ka dor kam dei ban palat ban ïa ka dor ha ka ri baroh kawei.
U Myntri Rangbah u la ïathuh ruh ba haduh mynta ka Meghalaya ka dang dei kawei na ki jylla kaba tad tam ka dor petrol bad diesel ha ka ri baroh kawei.
Shuh shuh u la ïathuh ruh ba da kaba pynkiew 50 naïa ha ka shi litar ka jylla kan ïoh lum khajna tam haduh 5-6 klur tyngka ha ka shisnem.
Na ka liang u Myntri Rangbah u la pyntip ruh ba lada phai sha Shillong ka dor jong ka petrol ka long 85.72 tyngka shi litar katba sha kiwei kiwei ki distrik ka ïapher khyndiat khynsoit eh katkum ka jaka.
Ha kajuh ka por u Myntri Rangbah u la pyntip ruh ba kawei pat ka rai ba ki shim ha katei ka sngi ka long ba ka jingsiew ïa ka khajna Value Added Tax (VAT) ba ki nongkhaii ki ju phah sha ka sorkar jylla dei ban phah noh hapoh 30 sngi ym shuh kumba ki ju phah mynshwa.
Da kaba ai nuksa, u Myntri Rangbah u ong ruh ba mynshwa ki nongkhaii kum ki petrol pum ki ju ïoh por haduh lai bnai ban siew ïa ka VAT sha ka sorkar kaba mut ba ki lah ban siew ïa katei ka khajna haduh ka sngi kaba 100 ban siew.
“Hynrei mynta ngi la pynduna ïa kane ka por bad ngi la buh noh tang 30 sngi ba kin siew ïa katei ka khajna,” la bynrap shuh shuh u Myntri Rangbah.
U ong ruh ba katei kadei tang ka jingpynbeit pynryntih ïa ka jingtreikam bad kam don satia kano kanon ka jingpynkylla ïa ka dor hynrei tang ïa ka por ban siew.
