Kiba don ki khmat ban peit kim lah ban ïohi jngai, ki bym ïohi pat ki khraw ka jingïohi jngai kaba kham phylla: Paul

Shillong, Nailar 04: U Nongai buit ka Tnat Social Welfare u Bah Paul Lyngdoh u la ong ba ki briew kiba don ki khmat ban peit hynrei kim don pat ïa ka jingiohi jngai, hynrei ki bym ïohi pat ki don ki jingiohi jngai kiba khraw bha.
Ïa kane u la ong ha ka prokram sam ïa ki tiar KIBO kiba long ki scaner ïa ki kot jingthoh bad kiba pynkylla pat sha ka bor ïohsngew kaba lah ruh ban pynkylla sha ki 18 tylli ki kyntien ha kaba ki briew ki bym lah ban ïohi ki lah pat ban ïoh sngew.
Kane ka jingsam ïa kitei ki KIBO kadei tang sha ki nongtrei Sorkar kiba trei ha ka Grade VI ha ki ophis Sorkar ha kaba da kine ki tiar kin lah ban treikam ha ki kamra treikam jong ki.
Ïa kine ki tiar la sam da u Bah Paul Lyngdoh kum u kongsan ha ka prokram Sensitisation on Assistive Technology and Degital Accessibility on Government Employees promoting an Inclusive Workplace for Employees on Visual Impairment ba la pynlong da ka Tnat Social Welfare ha U Soso Tham Auditorium Shillong.
Haba phai shuh shuh sha ka prokram u Bah Paul Lyngdoh u la ïathuh khana ruh shaphang ka Poitri shaphang u Sib Matlah uba la trei shitom bad uba la ïoh ïa ka bainong ka jingtrei shitom bad u la ong ruh ba bun ki briew kiba don jingïapher ha ki dkhot met hynrei ki kynjoh bun ki jingjop.
U nongaibuit ka tnat Social Welfare Bah Paul Lyngdoh u la kyntu ïa ki nongtrei Sorkar ba kin pynkylla ïa ka rukom peit ïa ka jingduna jong ki briew ba duna dkhot met bad ban tei ïa ki jaka treikam kiba kynthup lang da kaba pyndonkam ïa ki kor ki bor ai jingïarap.
Haba kren ha ka prokram pynsngewthuh halor ka Assistive Technology and Digital Accessibility na ka bynta ki nongtrei Sorkar ha Secretariat, u Bah Paul ula ban jur ba ka jingkynthup lang ïa baroh kynthup ruh ïa ki ba duna dkhot met ka dei ban ïaid palat ïa ki jingtei.
Katba na ka liang jong u Secretary ka Secretariat Administration Department u Swapnil Tembe IAS uba la pyni ïa ki jaka ba la buh kyrpang na ka bynta ki briew kiba duh ki bor ïohi ha ki jaka bapher bapher kiba don ha sawdong jong ka secretariat bad kumjuh ruh kiba hapoh ka Secretariat bad kiwei kiwei pat ki jaka, nangta ka Director Social Welfare ka Saloni Verma IAS kaba la ong ba ka kloi ban ïatreilang ha kino kino ki jingdonkam bad ka la ong ba kum kaba shakri ïa ki paidbah ka kloi ruh ban pdiang ïa ki jingai jingmut, ki jingtyrwa bad kiwei naba kum ka ophisar sorkar ka don ka jingangnud bad ka jingkitkhlieh ban ïarap ïa ki briew kiba ïapher ha ki dkhot met jong ki.
La kren lamphrang da ka Deputy Commissioner for Persons With Disabilities ka Kong Bridget Warshong, ha kaba ka la ong ba kane ka prokram ka dei u mawmer ba kongsan naba bun na ki briew kiba ym lah ban ïohi ki khmat ki mad bun ki jingeh ha ka ban ïohkam ïohjam naba kine kim dei na ki jingbym tbit ha ka pule puthi hynrei namar ka jingsngew ba kim lah ban ïohi ki mut ba kim lah ban pynep bha la ki jong ki kamram.
Ka la ong ruh ba ka Rights of Persons with Disabilities Act, 2016 ka la bthah ba manla ki tnat sorkar ki dei ban bhah kam kyrpang na ka bynta kine ki briew kiba ïapher ha ki dkhot met jong ki, kumta ha ki kam sorkar ki hap ban pule ïa ki jingpynbna ka sorkar, ki hap khmih bniah ïa ki file, pynshisha ïa ki kot sorkar bad kiwei khlem da shaniah ha kiwei pat ki briew, kumta ka jingwan wanrah ïa ki lad jingkyrshan technology kum ka Kibo kan lah ban wanrah ka jingkylla. Ka Kibo ka pynlah ïa ki kot ba la shon, kiba shu thoh da ka kti bad ka scan ïa ki kot ban lah ban pule jam da kaba shai, ka shah ïa ki bym ïohi ban khmih hi ïa ki kot ki sla bad ban shim jingkitkhlieh da ka jingshaniah.
La pdiang sngewbha da u Bah Lyngkor Kynjing MCS Commissioner Secretary For Persons With Disabilities, ka Padmashree Bertha Dkhar Executive Director Bethany Society, nangta la batai shaphang ka Kino (Knowledge In a BOx {AI Powered}) da u Senior Business Development Associate Kino Trestle Labs, Bengaluru u Rishabh Shakhapur bad ki kyntien ai khublei na ka Under Secretary ka tnat Secretariat Administration Department ka Kong Bariakor Diengdoh.
Ha kane ka sngi ka la don ruh ka jingsam ïa ki syrnot da u kongsan sha ki tnat sorkar kum ka dak ka jingkyntu ban long kiba trei shitom ha ka kam.