Shillong, Nailar 4: Ka Indian Meteorological Department (IMD) ka la ïathuh lypa na ka bynta ka Jylla Meghalaya bad Arunachal Pradesh, da kaba maham ba kan don ka jingther u lapbah ha kine ki 24 kynta ki ban wan.
Ka IMD ka la batai lypa ruh ba kan don ka jingslap jur ha ki katto katne ki district jong ka Assam, kaba la pynmih ïa ka jingsngewkhia ba ka lah ban don ka jingshlei um, jingtwa khyndew bad ka jingshah ktah jong ka rukom im jong ki briew.
Katkum ka jingïathuh ka IMD, kan don ka jingslap jur ha kylleng ki jylla jong ka thaiñ shatei lam mihngi. Ki District ha Upper Assam bad ki jaka kiba marjan ki dei kiba la khmih lynti ban mad ïa ka jingther u slap ryngkat bad ka jingdonlang ka eriong erngit.
Ki bor kiba dei khmih ki la kyntu ïa ki nongshong shnong kiba sah ha ki jaka kiba long them bad ki jaka kiba ju don ka jingtwa khyndew ba kin long kiba husiar. La kyntu ïa ki paitbah ba kin kiar ha ka ban leit sha kino kino ki jingleit ki bym donkam, khamtam ha ki thaiñ kiba long lum, namar ba ka jingther u lapbah ka lah ban lam sha ka jingwan kynsan ka um, jingtwa khyndew bad ka jingshah khang ka lynti ïaid.
Ka State Disaster Response Force (SDRF), National Disaster Response Force (NDRF) bad ki bor pynïaid district ki dei kiba la bthah ban long kiba husiar bad ban shim khia mardor haba don kino kino ki jingjia. Ka jingkiew ka um ha ki wah ka dei ruh kaba la peitngor bha na ka jingbteng jong ka jingslap kaba lah ban lam sha ka jingkiew ka um ha ki wah kiba kongsan bad ki wahduid.
Ka IMD kala kyntu ïa ki paidbah ba kin bud ryntih ïa ki jingpyntip kiba ïadei bad ka jinglong jingman ka suiñbneng bad ki jingbthah ban shim ïa ki lad jingïada kiba la pynmih da ki bor kiba dei khmih.
Haba ka aiom slap ka la sdang ban wan ha ka thaiñ, la bthah ïa ki nongshong shnong ban shim ïa ki lad jingïada tad haduh ba ka jinglong jingman jong ka suiñbneng kan long kaba biang noh.
