Shillong, Lber : Ka tnad ka Koit ka Khiah jong ka sorkar jylla ka la pynmih sa kawei pat ka episode ba la ai kyrteng ka jingïadei hapdeng ki kmie ki kpa bad ki khun samla.
Ïa kane ka jingïakren kaba long ruh kum ka jingsyllok bad ki khun samla ba dang khie la wan ban shim bynta da i Programme Officer ka RKSK, Adolesncent Health Kong Flourish Lyngdoh bad ruh i Dr. HH Mohrmen ba dei nongtrei monsngewbha.
Ka mat ïakren halor katei ka phang kadei eh halor ki khun samla ba dang khie ïa kaba la tip kum ka ‘adolescents unfiltered’.
Kine ki riewshemphang ki la batai bniah ïa bun ki jingeh ba kum ki kmei ki kpa ki kynduh ban pynheh pynsan ïa ki khun samla. Ki la ïatai ruh halor ka jingïapher ki khun samla ha kane ka juk ba mynta bad ka juk ba mynshwa.
Ki nongkren ki batai ruh ïa ki khun shaphang ka jingkylla ka met ka phad ha ka por ba ki khie samla bad ruh halor ka kam shongkha shongman.
Nalorkane, ki la kren ruh ïa ka jingdonkam ban phylliew jingmut halor ka phang kaba kumno ki kmie ki kpa ki ju kren ïa ki kyntien kiba pynjem rngiew ïa ki khun.
“Kumta ngi kyntu ba kum ki kmie ki kpa ngi dei ban pynjah noh ïa kine ki jingmlien,” ki la ong.
Shuh shuh ki la pynshai ruh da kaba ong, “Ngi baroh kum ka imlang sah lang ngi don la ka bynta ban pynwandur ïa ka lawei jong ki khun jongngi. Ban hikai ïa ki ba kin lait na ki ba bun ki jingeh kum ka jingïoh khun khynnah, ki jingdih pynbuaid, Ka jingïaid khlem ka thong bad kiwei kiwei de ki jingeh.”
Ki la kyntu ruh ïa ki kmie ki kpa bad ïa ki khun samla ba kin shim jingïarap na ki nongïasyllok ne ki counsellor haba ki shem kano kano ka jingeh ba ba kin ym don ka jingsngew artatien ne lehrain ha kaban pan jing ïarap.
Ïa kane ka podcast, Adolescents Unfiltered, phi lah ban peit ha YouTube lane sngap ha ka Spotify. Phi lah ruh ban peit hapoh ka Instagram.
