Shillong, Lber 19: Na ka liang ki khubor na ka bor District ka East Khasi Hills, ka la ong ba ka la pynïaid bha da kaba sted mynta ïa ka jingleit ai injek pyrshah ia ka jingpang shah dait ksew kaba long bih ne ka anti-rabi ïa ki ksew ha kylleng ka Nongbah Shillong, ban ïakhun bad pynduhjait ïa ka jingpang rabi hapoh ka District baroh kawei.
La ïathuh ba kane ka jingleit ai injek anti-rabi ka dei kaba la pynlong da ka District Joint Steering Committee on Rabies Elimination ka East Khasi Hills ba kynthup ïa ki bor District, ka Tnat ka Koit ka Khiah, ka tnat Veterinary, Shillong Municipal Board, ki Seng trei monsngewbha bad ki Dorbar Shnong bad kiwei.
Ïa kane ka jingai injek ïa ki ksew kynthup naduh kiba ri ki briew bad ki ksew surok, ka la sdang naduh ka 11 tarik Lber bad ha kine hynriew sngi ba la leit noh, la dep ai injek haduh 631 tylli ki ksew ha kylleng ki shnong ka Nongbah Shillong bad kiweik I jaka.
Shuh shuh bna ka liang ki bor District ki la pyntip ba ka jingshah dait ksew ki briew ha Jylla ka la kiew bha hapdeng kine ki shisnem ba la leit noh, kaba kiew na ka 5302 ngut ha u 2022 sha ka 9611 ngut ha u 2023.
La iathuh ba ha ka East Khasi Hills District ka dei kaba don bun eh ki jingjia shah dait ksew kaba don haduh 50% ki case. Ha u snem 2022, haduh 2512 ngut ki la shah dait ksew bad ha u 2023 kala kiew sha ka 5085 ngut.
La pyntip ruh da kaba ong ba haduh 80% na kine ki jingdait ksew ki dei kiba jia ha jaka sor nong ka Nongbah Shillong.
Katkum ka jingong ki bor ka koit ka khiah, ka jingdait lane ka jingkhlong ne ka jingjliah ïa ki dak mong ha ka snieh doh da ki ksew kiba don khniang rabi, ka lah ban pynbit jingpang ïa u briew bad ktah ïa ka jabieng bad u budlum nalor ka dei ruh ka jingpang kaba lah ban shim wat ïa ka jingim briew.
Kila ong ba ka jingpang rabi ka dei pat kaba lah ban ïada 100% bad ki jingïada kiba dei ban shim ka long ban sait wut wut ïa ki jaka ba shah dait da ka sabon hapoh ka um ba tuid kumba 15 minit eiei bad sa leit wad ïa ki jingsumar ha ki jaka sumar ba marjan ba kin ai ïa ki dawai injek.
Kila ïathuh ruh ba ïa ki ksew ba suba don jingpang rabi, ym dei satia ban pynïap hynrei ban teh ïa ki bad ban peit thuh haduh 10 sngi nalor ban pyntip ruh sha ki bor ba dei khmih ha kaba ïadei bad kane ka kam.
