Ki tnat jong ka Sorkar ki dei ban long kiba la pynkhreh na ka jingwan ka aïom slap: Conrad

Shillong, Jymmang 02: U Myntri Rangbah ka jylla u Conrad K Sangma ha ka sngi Thohdieng u la lum ka jingïalang bad ka State Disaster Management Authority bad kiwei pat ki tnat na ka bynta ban bishar kam halor ka jingpynkhreh na ka bynta ka jingwan jong ka aïom slap.
Ha kane ka jingïalang la don lang u Symbud Myntri Rangbah ka jylla u Bah Prestone Tynsong, ki Myntri sorkar ba kynthup ïa ka Myntri ka tnat ka Koit ka Khiah ka Kong Ampareen Lyngdoh, u Chief Secretary, Bah D P Wahlang bad kiwei ki heh ophisar na ka tnat IMD, PHE, Health, PWD, Power bad kiwei kiwei.
Ha kane ka jingïalang la donlang ruh ki Deputy Commissioner bad ki district officer na baroh ki district jong ka jylla kiba la shim bynta lyngba ka video conferencing.
Na ka liang u Myntri Rangbah haba khmih ïa ka jingpynkhreh halor ka jingwan jong ka aïom slap u la ong ba donkam ka jingïatreilang hapdeng ki tnat bapher bapher bad ki seng shnong naba kane ka long kaba kongsan bha ban pynkhreh ïa ki rukom pyrkhat kam, ym tang ban pynduna na ki jingshah ktah hynrei ban ïoh ruh ka jingïatreilang kaba bha ban pynduna ïa ki jingduh, ki jingmynsasw bad ban wanrah biang ïa ka bha ka miat kumba ka dei ban long.
U la bynrap ruh ba ki lad jingïarap kum ka umbam umdih, ki ïing ki sem dei ban pynïoh mardor lada wan kum kine ki jingjia. Haba banjur halor ki kam jong ka Block Disaster Management Committee, ki Village Disaster Managements Committee bad Village Executive Committee, u Myntri Rangbah u la bthah ïa ki deputy commissioner ban khot barabor ïa ki jingïalang bad dei ruh ban ai ki jingbatai kam, ki jingbthah sha baroh ki seng kiba don ha ki shnong ki thaw.
U la banjur ruh halor ka jingdonkam ban sam ïa ki lad jingtip sha ki paidbah lyngba ka lynti kaba dei kaba long ruh lyngba ki lad pathai khubor bad kiba dei ruh ha ki ktien shnong. U la pyntip ruh shaphang ki sienjam ba la shim da ka sorkar haba ïadei bad ki jingmaham kiba kham kloi bad bynrap, “Manla ki jaka ki dei kiba ngat ha ki jingshah pynjulor kum ka jingjia shlei um ha Garo Hills bad ka jingtwa khyndew ha Jaiñtia Hills, kumta donkam ban thaw ki lad ban ïathuh lypa ïa ki jingjia kiba lah ban pynjulor lyngba ki bor jong ka mariang.”
U Myntri Rangbah u la peit ruh halor ka jingdon ki nongtrei, nangta ki tiar ki tar kum ki puh shilum, ki lieng bad kiwei kiwei. U la ong ruh ba ki surok, ka um bad ka bording ki long kiba kongsan kumta donkam ban pynkhreh bha ïa kine ki bynta. U la banjur ruh halor ka jingdonkam ban pynkhreh da kaba pynlong barabor ïa ki mock drill ban wanrah ka jingsngew jong ka jingpynkhreh lypa ïa ki jingjia ban wan.