Kyntu u Lat ïa ka EC KHADC ban ïai pynneh pynsah ïa ki kam synshar khadar ha ki shnong

Shillong, Jymmang 02: Ki nongmihkhmat na ka Khasi Hills Autonomous District Council (KHADC) hapoh ka jingialam jong u Chief Executive Member (CEM) u Bah Shemborlang Rynjah ha ka sngi Thohdieng ki la leit ban ïakynduh ïa u Lat ka jylla Meghalaya u CH Vijayashankar ha Raj Bhavan.
Ïa kine ki nongmihkhmat na KHADC la pdiang sngewbha da u Lat ka jylla ha kaba u la pynkup burom ruh da kaba ai ïa ki da ki jaiñ Ryndia ba thaiñ ki Khasi.
Ha ka jingïalang u Lat ka jylla u la ai khublei ïa u Bah Rynjah bad ïa ki Executive Member hadien ba ki la shimti ïa ka kam synshar ha KHADC bad u la ai ka jingkitbok kitrwiang ïa ka samoi treikam jong ki.
Na ka liang ki Executive Member ki la batai lyngkot ïa u Lat ka jylla halor ki mat treikam jong ki ha District Council. Na ka liang u Lat u la banjur halor ka jingdonkam ban pynkhlaiñ ïa ki rukom synshar khaddar ha ki shnong ki thaw, nangta ban pynneh pynsah ïa ki bor pynïaid shnong bad ban wanrah ruh ki lad pynroi ha kine ki jaka bad ki thaiñ.
U la pynpaw ruh ka jingkyrmen ba kane ka Executive Committee kaba thymmai kan trei da ka jingaiti ban pyndep ïa ki jingangnud jong ki paidbah bad ban pynneh ïa ki jingkordor jong ka riti synshar ka ri kiba la pruid dak hapoh ka Sixth Schedule.
U Lat ka jylla u la pynpaw ruh ka jingsngewkhia shaphang ka jingdonkam ban pynneh pynsah ïa ki khlaw ki btap kiba don ha kane ka thaiñ Khasi Hills.
U la banjur ruh halor ka jingdonkam kyrkieh ban pynneh ïa ka sawdong sawkun da kaba wanrah ïa ki kam pynroi bad u la pynpaw ruh sha ki dkhot ka KHADC ba donkam ka jingïalang kaba khah khah khnang ban lah ban pynbha ïa ki kam ba ïadei bad ka sawdong sawkun da ka lynti kaba dei bad ka jingïatreilang.
Na ka liang u Lat u la banjur ruh halor ka jingdonkam ban kyntiew ïa ka kam Ayurvedic medicine, ka rep shynrai, bad ban pynkhlain ïa ka kam ri ngap kaba la ju leh ha kane ka thaiñ.
Ki Executive member ki la ïathuh ruh ïa u Lat shaphang ki jingeh ba ki mad ha kane ka thaiñ Khasi Hills bad ki la pan ki jingïarap pisa na ka bynta ban pynbun ïa ki lad pynroi khamtam na ka bynta ban pynneh ïa ka Khasi Heritage Village kaba don ha Mawphlang bad kumjuh ruh ki jingpynneh pynsah ïa ki kolshor bad kiwei ki lad jingtei kiba don ha kylleng ka thaiñ jong ka Khasi Hills.
U Chief Executive Member u la ai khublei ïa u Lat ka jylla halor ki jingkdew lynti jong u bad u la pynthikna ïa ka jingïatreilang kaba pura na ka bynta ban trei ïa ka bha ka miat jong ki paidbah ka thaiñ Khasi Hills.