Shillong, Nohprah 3 : Ka lynti iaid kaba kumno! Naduh ka jingpynshlur, jinghikai pyntbit ba kin ïaid da ka jingsngew skhem ha ki rynsan ban ïoh phong ïa ka pansngiat Miss Shillong mynta la sawphew tylli ki snem u nongïalam jongka Fashion Society Shillong (FSS) uba dei u Chairman jongka u bah Aldous Mawlong u la ong ha kine ki sawphew snem ka jingïakob ka la nangkiew shaphrang bad ka la nang bit nang biang.
Ka Miss Shillong Pageant ka dei ka rynsan kaba ki thei samla na kylleng ka jylla Meghalaya ki ïoh ban ïashim bynta ban pyni ïa ki sap ki phong bad jingbha briew ym tang ka dur ka rynïeng hynrei ka jingtbit ka jabieng bad khamtam ka akor ka burom bad ka jingsngewrit. Hooid ka sorkar ka ai ka jingïarap tangba wat la katta ruh kam pat da biang haduh katta katta ban ïoh pynlong ïa ka jingïakob kaba heh bad kaba phuh ba phieng kumba dei ban long.
Hynrei wat la katta ruh ka FSS kam shym duh jingkyrmen bad kam sangeh ban ïaid shakhmat ban pynlong ïa ka jingïakob ym shuh tang ka Miss Shillong, hynrei mynta lei lei sa ka Mrs Shillong bad Ms Supermon kaba long kum ka jingplie lad plie lynti ïa ki longkmie ban ïoh ïashim bynta kumba ka jylla ka dei kaba burom bad ai jait sha ka kmie.
Haba ïakren tang tiak bad u Chairman ka FSS bah Aldous Mawlong hadien ba la dep ïakren bad ki Thei Bhabriew ha ka Sngi Saitjain, naduh I Miss Shillong, Miss Cherry Blossom, Ms Supermon, Miss Traditional Model bad Mrs North East, u la ïathuh “ Ka lynti ïaid jong ngi ka la sdang naduh u snem 1983 bad ha ka por ba ngi sdang nyngkong ka long tang kum ka kynja prokram kaba shu pynlong kumto. Ym pat don kata ka jinghikai pyntbit, pynshlur bad ai mynsiem ïa ki thei samla kiba ïashim bynta hynrei katba nang ïaid ngi ïohi ïa ka jingdonkam ban ai jinghikai pyntbit ïa ki thei samla shwa ba kin kiew ha rynsan namar ki wan na ki jaka bapher bapher kumta la sdang ban ai jinghikai pyntbit ïa ki, ban hikai kumno kin ïaid, kumno kin jubab, bad kumno ban ym lehrain haba ïaid ha rynsan.
Kumta ka FSS ka ju ai jinghikai pyntbit ïa baroh ki thei samla ba wan ïashim bynta ha ka jingïakob kumba arbnai lynter khnang ba kin tbit haba ki ïaid ne jubab ha rynsan bad ban lait na ka jinglehraiñ bieit. Namar haba ki ïeng ha rynsan bad phai sha ki paidbah kin ym lehraiñ hynrei kin shim beit ba ki paidbah ki dei ki paralok jongki kiba wan ban ïa ai mynsiem ïa ki. Nangta la hikai ruh ïa ki kumno ban ïaid da ka khmat ba phuh samrkhie, ban kren ban jubab khlem jingkyiuh bad bun kiwei kiwei ki jinghikai.
Ka jinghikai ka long ym tang ba kin kren bad ïaid hynrei kumno kin jubab khlem jinglehraiñ bad don ka jingshaniah ha lade bad kane ka ïarap ïa kine ki thei samla wat haduh ba ki leit interview ïa ki kam ki jam ruh namar ki la ïoh ka jinghikai kaba biang, ïathuh u bah Aldous.
U la ong shuh shuh ban da dei ba biang ka fund ka FSS ka lah ban leh shibun kiei kiei namar 40 tylli ki snem la ïaid lynti kumta la shemphang bha ïa ka kam. Mynta u snem dei u snem ba ka FSS ka dap 40 snem ka rta. “ Ngi sngewtynnad ïa kane ka jingïaid lynti kaba la poi sha u maw mer ba 40 bad ngeit ba ngin dang ïaid bad kiew shaphrang” ong u bah Aldous. U la ïathuh “Khlem ka jingïarap na ka sorkar ym poi shano shano ruh bad u pynpaw ka jingsngewnguh ïa ki tnad sorkar kum ka Sports and Youth Affairs, Arts and Culture, Tourism, Sericulture and Weaving bad kiwei kiwei kiba la ju ïarap na ka por sha ka por. U la ong “Kine ki tnad ki ïarap bha ïa ngi bad don napdeng jongki haba ki pahuh ka pisa ki kham ïoh ban iarap bun ruh ïa ngi. Nalor kata ngi ju ïoh ki jingïarap na kiba treikam business, na ki riew shimet, ki nong noh synniang bad ter ter”.
U la ong “ Ka thong jongka FSS kam long ban sei ïa ki thei samla tang hapoh ka jylla hynrei ban pynshlur ba kin leit ïashim bynta sha kiwei ki rynsan jingïakob kum ka Miss North East bad kiwei kiwei bad wat shaduh ka Miss India ruh. Ngim lah ban len ki thei samla ha kane ka juk ba mynta ki don ka rynïeng, ka dur ka dar kaba biang bad ki lah ban ïashim bynta wat shabar ri ruh”.
Haba kren halor ka jingkob Supermon u bah Aldous u la ïathuh “ Ngi la ïa pyrkhat sani bha hadien ba la bishar bniah bad ïohi ba ki don bun ki samla kiba shah ieh khunrei hynrei kiba don ka sap ban kren, ban ïaid, ki don ka dur ka rynïeng kaba biang bad khamtam ki don ka jingthrang ban ïashim bynta ha ki jingïakob bad na kata ka daw ngi la plie lad ïa ki da kane ka jingïakob ba kin ïoh bynta bad ba kin don ka jingsngew ba kim shym la shah ïeh khunswet hynrei ba kin ïeng ha la ki kjat ban wad ïa ki lad ki lynti bad ba kin lah ban kit ban bah ïa la ka long ïing longsem kum kita ki ‘superhero’ na kata ka daw ngi sa jer kyrteng Ms Supermom”.
Nalor ka Miss Shillong , ka don ruh ka Miss Small is Beautiful bad kane ka long kum ka jingplie lad pat ïa kiba dang long theilud. Ka don ruh ka Mrs Shillong bad ter ter. Ha u snem ban wan kan don sa kawei ka jingïakob kaba ym pat kwah ban ïathuh mynta hynrei lehse kham hadien habud.
Haba ïakren bad ki thei bhabriew kiba la jop ïa ki jingïakob bapher bapher I Miss Chaivalry Lartang iba la ïoh phong ïa ka pansngiat Miss Shillong 2023 i la ong “ Ha kaba nyngkong eh nga kham ruid ruid bad lehraiñ hynrei hadien ba la jop ïa kane ka jingïakob ka la pynlong ïa nga ban lait war na kita ki jinglehraiñ bad nga la nud ban ai mynsiem ïa ki para samla ba kin ym lehraiñ hynrei ban wan shakhmat ban pyni ïa la ki sap ki phong bad ban pynurlong ïa kita ki jingphohsniew ha ka jingim jongki”.
Iwei pat i thei bhabriew iba jop ïa ka nam Miss Cherry Blossom 2023 i Jollyne Lyngdoh i la ong “ Nga kwah ban ai ïa ka khubor sha baroh ki para samla ba kim dei ban don ka jingartatien ïalade bad buh hakhmat ïa ka mynsiem ba kim lah ban leh. Hooid nga ruh nga long kumta mynshwa hynrei ban lait na kane hap ban leh ei ei bad hap ban kren ban puson bha ha lade namar lada phi leh kumta phin dap da ka jingsngewkmen bad phin sa lah ban leh ïa kiei kiei kiba phi don ka jingthrang ha ka jingim ka jongphi”.
I Samla lud ba ïoh ia ka nam Best Traditional Model 2023 i Hazel Mukhim ba dang 17 snem ka rta i la ong “ Nga sngew sarong ba nga la ïoh ïa ka kabu ban ïaid ha rynsan bad sem da ka jaiñsem dhara bad nga da sngewkmen bad sngew sarong ruh ïa ka riam ka beit tynrai jong ngi ba nga la jop ïa kane ka nam”.
I Genevieve Pala, i kmie jong ki lai ngut ki khun bad iba la ïoh ïa ka nam Supermom 2023 i sngewkmen eh haduh katta katta ba i la ïoh ïa kane ka pansngiat. “ Katno ka long kaba pynkmen ïa nga ban ïoh ïa kane ka nam bad nga ngeit skhem ba kane ka nam Supermom kan pynshlur bad ai mynsiem ïa baroh ki kmie namar ban long kmie marwei kam long kaba suk bun ki jingeh bad ki diengpyngkiang ha ka jingim kiba nga la ïa kynduh hynrei ngam ju kynran dien nga tur bad jop beit ïa ki bad kane kan long ka khubor ïa kiwei ruh ban ym ailad ïa ki jingeh ba kin ban hynrei ban tur shaphrang haduh ban da jop”.
I Evangel Lartang iba dei i Pharmacist bad kmie jong iwei i khun kynthei i la jop ïa ka pansngiat Mrs North East India 2023. I la ïathuh ka jingïakob ka long kaba eh bha khamtam ban ïakob bad ki longkmie na kiwei kiwei ki jylla kane ka thaiñ “ Hynrei ka dei ka lynti ïaid kaba ai jinghikai ïa nga bun kiei kiei namar nga la ïoh jingmyntoi shibun na ki paralok ba ïashim bynta ha kane ka jingïakob”
