Shongkun ka dorbarbah jong ki longmie ka Synjuk ki Kynthei Katholik ka Shillong Archdiocese

Shillong, Nohprah, 03: “U Briew uba shu sngap ïa ka Ktien U Blei, hynrei um leh ïa ka, u long kum u briew uba peit ïa ka dur ka dar ha ka iitkhmih,” Jakob: 1:23 ka long ka phang pdeng ha ka dorbar pyllun bahynñiew jong ka Synjuk ki Kynthei Katholik Shillong Archdiocese ïa kaba la pynlong ha Mawbri, Zone VII ha ka sngi U Blei.
Ïa kane ka dorbar pyllun ba la lamkhmat da ka President ka Kong Kiltidora Marbaniang bad ka Secretary ka Kong Joplin Nongdhar da ki phew hajar ngut ki longkmie bad ki samla na hynñiew tylli ki Zone ka East Khasi Hills District bad Ribhoi District ki la ïashim bynta ha kane ka dorbarbah kaba ar sngi jong ka Synjuk. Ka jingkular ka long ban rat dyngkhong ïa ka shongkha khynnah bad hapdeng jingduk ha ka jinglong mynsiem ban wanrah noh ïa ka spah mynisem kaba hok da ka jingtrei shitom kaba hok bad ka jinglehbha ïa ka imlang ka sahlang da ka saiñdur jong U Blei.
Ha ki ar sngi, ki longkmie ki la ïoh shibun ki jingmyntoi na ki nongkren. Da katei ka mat phang pdeng ki longkmie ki la puson bad shim rai ban pyntrei ha ki Balang shnong, ha ki shnat niam bad ïa kane ka rai la shim ha ka sngi pynkut ïa ka dorbar.
U Archbishop jong ka Jylla Niam Bah Shillong u Most. Rev. Victor Lyngdoh u long u kongsan ban tyrwa ïa ka nguh ka dem Blei ryngkat ka jingïasynran jong u Parish Priest ka Epiphany Church, Mawbri u Rev. Fr. Balenstine Marbaniang , u Fr. Alfred L. Nongbri uba long u Spiritual Director jong ka Synjuk ki Kynthei Katholik Shillong Archdiocese bad kiwei pat ki Lyngdoh Sohble.
Ha ka sneng ka kraw, u Archbishop u la khot bad wer ïa ki longkmie ban seng ïa ka iing ka sem kaba janai da ka jingieid ban wanrah ka jingpynkylla ïa ka pyrthei da ka jingim kaba janai bad kaba skhem.
Hadien nguh ka dem Blei, ka Synjuk ka la pynkupburom ïa ki longkmie ne nongtrei balang kiba la long ki soh jong ka jinglen lade na ka bynta ban pynphriang ïa ka jingshai jong ka ktien U Blei ha ki shnong ki thaw ïa kaba la pynkup burom da u Spiritual Director ka Zone VII u Rev. Fr. Kaldinus Majaw
Ha ka nohphai sngi, ka la don ka jingïalang ba la pynïaid da ka Synjuk hapoh ka jingïalam jong u Rev. Fr. Kaldinus Majaw uba la long kum u kongsan bad uba pharia ruh ïa ka ktien U Blei sha ki longkmie.
Haba pynsngew ïa ka khubor jong ka jingieid ki longkmie ïa ka iing ka sem, u la ong, ka dei ban long kaba la tei da ka jingieid Blei. Lada ka longiing kaba skhem kaba la aiti ha u Blei ki laitluid na ka jingsniew namar ki kynmaw ba u Blei u long u Trai, u nongda bad u nongtei ïa ka iing ki sem ha ka jinglong mynsiem bad jinglongmet jong ka pyrthei.
Ïa kane ka dorbar jong ki longkmie la ïatai kyrpang halor ka mat jong ki longkmie ba ki dei ban long ki sakhi kiba kyrpang ha ka imlang ka sahlang khamtam ba ki longkmie ba ki long ka bynta kaba kham khraw na shalyndet kaba long kum ka jingkyrshan kaba radbah, kata, la ka long ha iing ha sem ha Balang, ha ka imlang ka sahlang bad wat ha ka saiñpyrthei.
La pynkut ïa kane ka dorbar da ka jingpynhiar ïa ka lama da u Spiritual Director bad ka jingpynbna ïa ka Dorbar Pyllun kaba ban sa long ha u snem ban wan ha St. Paul Upper Shillong Parish, Zone I. Hapdeng ka jingïalang paidbah, na ka liang jong ka synjuk ka la ai ïa ka kaiphod treikam bad la pynkut da ka jingrwai ïa ka Anthem jong ka Synjuk.