Ka long kaba sngewtynnad ban pyrkhat ba ïa kane ka jylla Meghalaya jong ngi la ju tip kum kata ka jylla Khristan ne ka Christian State.Kane ka long ruh kaba shisha ha kaba baroh ngi lah ban sakhi ba man ka sngi U Trai baroh ki shnong ki thaw ki kynjah bad bun ki iew ki hat ki khang ha kane ka sngi, bad kane kam mut eh ba ki briew kiba shongdukan ne treikam ki dei ki Khristan, hynrei haba ki paidbah kim iatuid namar ba ka dei ka sngi mane Blei jong ki, te tang khyndiat eh kiba iaplie dukan bad iadie iathied ym dei satia kumba long man la ka sngi. Ka jingkhang ki dukan bad jaka treikam ka dei eh tang na ka daw ba ki dei ki Khristan hynrei wat ki riew paidbah hi ruh ki ju sngewtynnad ban don kawei ka sngi ha kaba kin lah ban shongthait.
Kum ka jylla Khristan, la sakhi ruh ia ka jingbun jong ki Balang Khristan, ha ka jingshisha ki long kawei namar ba ki ngiet beit ha U Jisu u nongpynim jong ki. Hynrei ha ba kren paidbah wat ia ki kynhun Khrstan ruh la niew ne ong da ki niam, don kiba ong phi ialong niam aiu kaba mut long balang aiu, kum ka Balang Katholik, Presbyterian, Balang U Blei ne ki Balang Fellowship bapher bapher. Na ka bynta ki briew kiba ym dei ki Khristan bad ki bym da ioh bam ngam jylliew ia ka jingtip kin shem jingeh shibun ban sngewthuh shaphang kine ki Khristan namar ba ki leit la ka jong ka jong ka kynhun, hynrei ki khamsuk ban ithuh ia ki Hindu, ne ki Muslim, Buddhist bad kiwei namar ba ki dei kawei na kajuh beit ka kynhun bad ka jinghikai jingngiet jong ki.
Ha ka kyntien paidbah bad ruh ka jingngeit ba long riew paidbah kaba dang long tang na sla, shibun ki jingsngewthuh bakla ki mih. Ki khristan kiba don ha ki kynhun bapher bapher kim da lah eh ban shemphang ia kata ka jingshakri Blei kaba shisha, hynrei ki ioh pynban ia kata ka jingsngew ba dei ka kynhun jong ngi kaba kham bha ban ia ka jong kiwei pat. Kane ka rukom pyrkhat ka wanrah ia shibun ki jingsngew iapher bad ki duh noh ia kata ka dohnud kaba shisha jong U Blei kaba long ka jngieit. Kum ki riew paidbah kan eh shibun ban shemphang haba peit sha kine ki Khristan naba bun na ki kim pat sngewthuh hi ruh ia ka nongrim kaba ki don. Ka Psalm 11:3 ka ong, ” Lada pynduh noh ia ka nongrim, kiba hok kin lah leh aiu?” Kaei mo kata ka nongrim lada kam dei ka ktien U Blei?
Kumjuh ruh imat ka long shisha ba ki jingeh hapdeng ki Khristan ki mih namar kim shemphang ia ka nongrim jong ka jingngeit jong ki. Ki kynhun (balang) bapher bapher ki long shisha kum ki skul ban ai ia ka jingbsa ba kynja mynsiem sha baroh ki riewngiet, hynrei la iohi ba kane ka jingthmu kam poi kumba ka dei ban poi Bun bah ki khristan kim tip ia kata ka nongrim jong ka ktien U Blei bad dei na kata ka daw haba wan ki jingeh ki mih shibun ki jingleh bad jingkren kulmar. Ka long kaba donkam ia ki Balang bapher bapher ban pynkhlain ia ka ktien U Blei khnang ba ki riewngeit kin long kiba skhem jingmut bad im ha ka jingieit kumba u Blei u thmu.
Hato ka long mo kaba shisha kumba ong uwei u nongseng kynhun Balang ba lada ki bangiet khristan ha kawei ka kynhun balang ki don 1000 ngut donkam ruh 1000 ngut ki nongtrei khnang ba yn lah bandon ia ka jingiasyllok bad ka jingbuddien kaba marmet bad ki bad pynthikna ba kin ioh ia ka jingbsa kaba biang. Hynrei kan ym long hi kumta, pynban ka long kaba donkam ba ki bangiet ki dei ban sngewthuh ba ki Balang kiba ki don ki long shisha tang kum ki skul ai jinghikai kumno ba kin lah ban san ha ka jinglong mynsiem khnang ban pynkhlain ia ka jingiadei shimet jong ki bad U Blei.
