Ïa ka jaidbynriew Khasi la pynlong da ki Kur kiba dei ki longïing ha ka imlang sahlang, ki don shibun bah ki Kur ha ka jaidbynriew, ha kane ka bri u Hynniewtrep. Kumjuh ruh ia ki longiing la pynlong da ka shongkha shongman kaba dei ka bynta kaba kongsan tam ha ka imlang sahlang. Ki kur khasi ki don ïa ka bynta kaba khraw eh ha ka imlang sahlang khamam lei ha ki thaiñ nongkyndong ba dang ïabat ïa ka rukom barim wat ia ka synshar khadar ruh dang ïa bat hi da ki Kur bad kiwei pat ki bym dei na kata ka Kur ba kongsan jong ka thaiñ kim lah ban ïadon bynta ha ki kam Sordar Shnong ne Rangbah Shnong. Namar ka jingroi jong ka jingstad bad jingnang jingtip bun ki dkhot jong ki kur ki la poi sha ki bynta bapher ka jylla, ka ri bad ruh shabar la ka ri. Hynrei ka jing shim khia jong ki Rangbah Kur bad ki nongïalam jong ki ban tehsong ïa ka kur ka wanrah ïa ka jingïatylli bad ka long ka jingmyntoi ïa ka jaidbynriew ki kur ka bri u Hynñiewtrep.
Ki Durbar Kur ne ki Seng Kur ki don shisha ïa ka bynta kaba khraw ha ka imlang sahlang ha kine ki sngi khamtam leh ha kane ka juk ïabeh rongphong bad pyrthuh nongwei lut. Kane ka juk kaba mynta ka dei shisha ka juk kaba bun na ki Khasi ki la sdang ban blaad ïa la ka jong ka jinglong tynrai, hynrei ki la bang palat ïa ka jingim bad jinglong jingman kum ki nong sepngi. Ka riam ka beit, ka akor ka burom bad ka shongkha shongman ha kine ki sngi ka la long kaba laitlan palat haduh katta katta. Kane ka pyni ba ka don ka jingsynjor jong ka imlang sahlang ha kine ki sngi, namar, ba haba shu peit la i kumba ym don jaidbynriew shuh khamtam lei ha ki samla lait noh tang lada ïa kylli, ki dei ka jait ka kur aiu ba sa sngewthuh bad ithuh ba ki dei ki Khasi. Kumta lada ki Durbar Kur kin long kiba khlaiñ, kan long ka jingmyntoi kaba khraw ïa ka jaidbynriew lada ki ruh kin shim khia ban peit ba ka jinglong tynrai kam dei ban duh, hynrei ban kyrshan tyngeh bad pynneh ïa ka burom ka jaidbynriew Hynniewtrep.
Ka Seng Kur ka don ïa ka bynta kaba kongsan ban pynsngew sha baroh ki dkhot jong ka kur halor ka akor ka burom bad khamtam ka shongkha shongman. Ka jinglong rangbah bad shim khia jong ki rangbah kur kan long ka nuksa kaba khraw ïa ki khun samla ka Kur ban ñiewkor ïa la ka jong ka kur bad pynneh ïa ka akor ka burom. Katno ka la long lypa ka nuksa kaba bha ba kiba bun ki kur ki la leh kum kaba ki la pyndonburom ïa ki kur kiba la wan shakhmat ha ki eksamin bapher bapher, kiba bat ïa ki kam ha ki kyrdan bapher bapher da kaba ai khusnam sha ki kum ka jingithuh ba ki la wanrah burom ïa ka kur hi baroh kawei. Nalor jong ka jingteh song tylli kawei ia ka kur, ka jingsneng jingkraw bad ai mynsiem ïa ki kur ban ri burom bad ñiewkor ïa la ka kur, ka shongkha shongman ka dei uwei na ki rishot ba radbah jong ka imlang sahlang. Namar ba haba ka shongkha shongman ka long kaba donburom, ka wanrah ïa ka longïing kaba donburom bad ka ai burom ïa ka Kur bad ka jaidbynriew hi baroh kawei.
Ka jinglah jong ki nongïalam ka kur ban btin lynti ïa la ki khun ki pyrsa ban long kiba ieit ïa ka akor ka burom khamtam ha ka shongkha shongman kan kyntiew ïa ka lawei jong ka Jaidbynriew. Ka kur kaba lah ban bat ryngkhi ïa ka akor ka burom ka pynlong ïa ki para ki pyrsa ba kin ñiewkor khamtam eh ïa kane ka bynta bad ba kin lah ban wanrah ia ki longïing longsem kiba don akor don burom. Haba biang ka poi kha poi man khlem pep ki longïing kin long kiba khlain bad kin long shisha ki rishot na ka bynta ka jaidbynriew. Haba ki longiing ki khlain, ka kur ka khlaiñ, haba ka kur ka khlaiñ ka jaidbynriew ka khlaiñ.
Ka riam ka beit ha kine ki sngi kiba mynta ka la long shisha kaba u mynnor um shym la poi pyrkhat ba kan long haduh kat une u pud haba ym ithuh kynthei shynrang shuh. Ki dak ki shin kata ka jinglong jaidbynriew Hynniewtrep ki la jan jah. Uwei u nongjngoh kai pyrthei u la ong ba ha ka jingshisha u la khmih lynti ban ïohi ïa ka jinglong tynrai ha ki nongshong shnong, hynrei ki la long nongsepngi lut khamtam lei ki samla. U la pynpaw ba hooid sngewtynnad ban ïoh sngew ba ki samla Khasi ki bit bha ban kren phareng, tangba kaba sngew bynñiaw pat, ba imat kane ka jaidbynriew kan sa jah noh ha kawei ka sngi. U ong ba kum ki briew kiba ieit ban shang kylleng ka pyrthei, kaei kaba ki kwah ban ïohi ym dei ba ki briew ki pyrshang ban im kum ki nongsep ngi, hynrei ban ïohi ia ka jinglong tynrai kaba u nongbuh nongthaw u la buh bynta. Kam dei ka kam kaba suk ïa kano kano ka kur ban teh lakam ïa kine ki jingeh, hynrei ka jingïai pyrshang kaba bha ka dei, kaba dei hok ban ai mynsiem da baroh.
