Ki Sengbhalang ki dei ban wad jingtip kaei kaba jia ïa ki Garo hadien ba poi ka Rel ha Mendipathar: Dr. Ampareen

Shillong, Naitung, 18: Ka Myntri jong ka Sorkar Jylla ka Dr.Ampareen Lyngdoh kaba long ruh ka nongaiktien jong ka Sorkar ha ka sngi Baar ka la kyntu ïa ki kynhun kiba pyrshah ïa ka lynti Rel ba kin dei ban leit wad jingtip kaei kaba la jia ïa ki paidbah ha rilum Garo hadien ka jingpoi ka lynti Rel ha ka shnong Mendipatar, North Garo Hills District.
“Kino kino kiba pyrshah ïa ka lynti Rel ki dei ban leit sha Mendipathar bad ban da tih bniah hato ka don shisha neem jingwan rung kyrthep jong ki briew kiba nabar bad la ka dei neem kaba shisha ba dei tang ka jingshah pynbiej jong ki paidbah,” ong ka Dr. Ampareen ha ka jingïakren bad ki lad pathai khubor.
“Ngam pat sdang ïa ka jingwad bniah kaba kum kata hynrei nga tip ba khyndiat khynsoit ki jingpynmih bad ki mar rep la shalan mynta shabar ka jylla ha ka dor kaba jem,” ka la bynrap.
Ka Myntri ka la ai ïa kane ka jubab halor ka jingkylli ha kaba ïadei bad ka jingpyrshah jong ki kynhun bapher ïa ka Sorkar kaba la thmu ban leh ïa ka jingtohkit ha kaba ïadei bad ka jingpynpoi ïa ka lynti Rel sha East Jaiñtia Hills.
Haba pynpaw ba ka Sorkar MDA kan ym leh ïa kano kano ka kam kaba long pyrshah ïa ka mon jong ki paidbah, ka Dr. Ampareen ka la ong, “ngi hap ban don ïa ka imlang ka sahlang kaba kloi ban pdiang ïa kano kano ka kam pynroi.”
“La ka dei ne kam dei, ka Sorkar kan hap ban ïaid shakhmat ban pynurlong ïa ka jingpynïasoh da ka lynti Rel ha ka jylla. Ngam tip lehse ha rilum Garo ki la long kiba kloi. Namarkata, ka thaiñ kaba kloi ban pdiang kan ïoh nyngkong bad ka thaiñ ka bym pdiang bad kiba pyrshah ngin ym leh satia ban leh pyrshah ïa ka mon jongno jongno ruh namar ha kaba kut hi ngi synshar na ka bynta u paidbah bad da u paidbah,” ka la ong.
Haba kylli, ka Dr. Ampareen ka la ong, “namarkata, ngi ïai ong, haba ngi ïoh ïa ka kabu ban ïoh ïa ka Rel ai ba ngin ïaid shakhmat bad ngin wat ia ki daw da kaba leit jurip bad da kaba wad bniah kiei ki jingmyntoi bad kiei ki jingduh jingmyntoi.”
“Phi la ïohi kumno kiwei ki Hill Station ki la don ia ki lynti Rel bad ka dei kaba kham phylla ban don ia ki lynti Rel ha ki Hill Station. Peit ia ka Shimla, Darjeeling, ki dei kiba paw bha ha ki kam jngohkai pyrthei hynrei ngin hap ban peit hato kane kan treikam neem bad nga la ïoh jingtip ka Mendipathar ka biang bha. Ka dang dei tang ka ïohsngew ba ïa ki mar rep la shalan shabar ha ka dor kaba jem, ka rilm Garo mynta ka kiew bha ha ka teknoloji bad ha kiwei kiwei de ki kam,” ka la ong.
Da kaba kyntait ban kynthoh shuh shuh, ka Dr. Ampareen ka la ong, “ngi hap ban don ïa ka mishon, ngi donkam ban peit ruh ïalade, phim lah ban shu kren matlah da kaba ong em lane phi hap ban ong haoid.”
“Kano kano ka mat ka dei ban don ka jingïathir kaba bniah bad ngam lah ban shu kynthoh ha kum kane ka por hynrei katkum ka jingtip jong nga, ka jingpoi ka Rel ha Mendipathar ka la pynmyntoi shikatdei eh ïa ki paidbah ka rilum Garo bad ngi ruh ki don la ki jong ki jingeh. Ki jaka jong ngi kim dei kiba long them hynrei ki dei ki jaka rilum,” la ong ka Dr. Ampareen.