Man ba mih ka result eksamin kam bun bha ki samla ki ud bad diaw ban ïohi ba kim shym la lah satia ban ïoh ïa ka jingjop wat ban pass tang ïa ka written Test ne jingthoh eksamin ba kin lah ban shah jied ban ïoh rung sha ka Personal Interview na ka bynta ka kam sorkar. Ym tang ha ka nongbah Shillong ne ka East Khasi Hills District, hynrei wat ha kiwei pat ki District ba kham dei sha ki thaiñ nongkyndong ruh ki ud bha halor kane. Kat ka jingpyrshang ban twad jingmut na kiba bun ki samla la sngewthuh ba nalor ba ki long lypa kiba tlot ha ka jingpule wat la ki la dep ban pass ïa ki kyrdan ba donkam na ki skul, college bad unversity ruh hynrei kim lah pat ban ïoh ïa ka jingjop ha ka jingwad ne aplai kam. La shem ba kawei na ka jingsahdien jong ki samla kadei ka jingbymbiang jong ki lad jingïarap ban ai jinghikai ne coaching ïa ki kumno ban pynkhreh na ka bynta kine ki jait eksamin rung kam.
Nalor jong ka Meghalaya Public Service Commission (MPSC), ngi don ruh sa ki District Sellection Committee ha ki District jong ka jylla, hynrei kiba bun ki samla khamtam ha ki District nongkyndong kim ïoh satia ïa ki lad jingïarap kumno ba kin lah ban pynkhreh ïa ki eksamin kam bapher bapher bad ki shu shaniah beit tang halor ka jingpule kaba ki la pyndep na ki College bad ki University. Kumta ka long shisha kaba donkam ïa ka sorkar ban plie ïa ki lad ki lynti naka bynta ki samla ban ïoh ïa ki jaka ne ki centre ba lah ban ai jingïarap ïa ki samla kumno ba kin lah ban pynkhreh na ka bynta kine ki eksamin bapher bapher. Namar ba ngim lah ban len ki don shibun ki samla kiba proh wat ha ki thaiñ nongkyndong ruh, hynrei namar ka jingbymbiang ki lad jingïarap ki duhlad noh ban poi sha kaei kaba ki thmu ha ka jingim.
Kan long ruh kaba myntoi shibun lada ka sorkar lyngba jong kum kine ki centre kan lah ruh ban bynrap ïa kiwei pat ki lad ai jinghikai khamtam lei ha kaba pynshlur ïa ki samla kumno ba kin lah ban seng ïa ki kam la jong bad ïeng ha la ki jong ki kjat, la ha ka kam khaii, kam rep, kam karkhana bad kiwei pat ki skill training ba donkam kum ha ka Sales bad kiwei pat. Kumba ka ju don ka jingong ba lada phi tyrwa ïa ka pisa ban seng kam bad ïa ka kam sorkar, kito kiba shi sur shi dur kin kynrup beit ïa ka kam sorkar hynrei kita kiba sian pat kin jied ïa ka pisa ban seng kam seng jam. Namar kaba trei ha ka kam sorkar kan lah ban kyrshan ne ai jingmyntoi beit thik tang kumto kumba ka sorkar ka la mang bad pynkiew kat kum ka jingiaid jong ka por, hynrei ka kam seng kam la jong ka lah ban pynroi bun spah shah ha ka jingim jong ki.
Hooid ha Shillong ki don ki jaka ai jinghikai jong ka sorkar kum ka Meghalaya Administrative Training Institute (MATI) bad kiwei pat ban ïarap ïa ki samla, ki don ruh ki centre jong kiwei pat ki Seng trei mon sngewbha bad ki jong ki seng bapher bapher. Hynrei kan bha ruh shibun lada ki samla jong ki thaiñ nongkyndong ruh kin ïoh ïa kum kine ki lad jingïarap ba donkam khnang ba kin long kiba la khreh bad long kiba tbit bad ïoh hikai ban trei ïa ki kam sorkar bapher bapher khamtam lei ki donkam bha ïa ka jingmaitphang ban pynshlur ïa ki samla kumno ban kot sha ka kyrdan wat haduh ka ban ïakhun ïa ki eksamin kam bapher bapher ym tang jong ka MPSC hynrwei wat ki ka Union Public Service Commission kum ki Administrative Service, Civil Service bad kiwei kiwei pat ki kam ba dei jong ka Defence bad ki Forces.
Ka jingai jinghikai sha ki samla ban shemphang kumno ban trei ha ki kam la jong kan ïarap ruh ban kyntiew ïa ka ïoh ka kot jong ka jylla bad kan pynlong ruh ïa ki samla ban ym kyrduh kam kyrduh jam. Lada la lah ban don shisha ki samla kiba trei ha ki kam la jong ban pynïar ïa ki, kine ki trai jong ka kam kiba dei ki nongshnong shnong trai jong ka jylla kin lah ruh kyrshan aikam lang ïa kiba bun kiwei pat ki para doh para snam. Kumba ngi lah ban ïohi ba mynta ki don shibun bah ki samla Khasi na ka jylla Meghalaya kiba leit ban trei sha kiwei pat ki jylla hapoh jong ka Ri namar kim lah satia ban ïohkam ha la ka jong ka jylla. Kumta ki samla pule ha kylleng ki bynta jong ka jylla ki dei ban khih bad pynpaw ïa kine ki jingdonkam sha ki nongmihkhmat paidbah jong ki thaiñ bad ki Constituency jong ki, khnang ba yn lah ban thaw ïa ki buit treikam ne policy ban wanrah ka jingïarap kaba donkam sha ki samla jong ka dong bad ka thaiñ hi baroh kawei.
