Ki paidbah ki don ka hok ban dawa bai lutksan lada pynlip bording khah khah ong ka Sorkar Pdeng
Shillong, Risaw 29: Ka Sorkar Pdeng ka la pynkupbor ïa ki paid Nongthang bording elektrik ba ki don ïa ka hok ban dawa bai lutksan na ki kompani sam bording, lada kine ki kompani ki la pyntreikam ïa ka jingpynlip bording ba khah khah ne ka Load Shedding ha la ka mon bad ba shu leh khlem nongrim.
Kane ka long kat kum ka Electricity (Rights of Consumer) Rules, 2020, kaba kren shai ba kam dei ban don satia ka jingpynlip bording ba khlem nongrim ne ba leh khnang da ki kompani ba sam bording.
Kat kum ka jingong jong ka Power Ministry ka Sorkar Pdeng, ki nongthang bording elektrik ki don ïa ka hok ban ïoh ïa ka bording ba 24 kynta ha baroh 7 sngi ha ka shitaiew (24×7) bad ki don ruh ïa ka hok ban dawa ïa ka bai lutksan na ki kompani ba sam bording.
Ka Jylla Meghalaya ka dang ïai bteng ban mad ïa ka jingeh na ka jingpynlip bording (load shedding) ba da ki snem mynta, ïa kaba la ai daw na ka jinghiar ka um ha ki Hydro Project (dam) ha ka por rang ryngkhiang bad ruh na ka jingïabujli bording (swapping).
Ka MePDCL ha kine ki bnai ryngkhiang ba la leit noh, ka la pynlip bording ba kot hapdeng 8-10 kynta shisngi hapoh ka Jylla, kaba la ktah jur ïa ki longïing kiba duk bad ki longïing ba duna ka jingïoh namar ka jingbym lah kyrshan ban thied ïa kiwei pat ki lad tbeh jingshai ïa la ka ïing ka sem.
Wat ki nongsengkam barit baria ki la shah ktah jur bha ha ka jingpynlip bording jong ka MePDCL.
Hynrei wat hadien ka jingwan ka lyiur bad ka jingshlei jong ki dam jong ki Hydro project, ka MePDCL ka dang ïai bteng ban pyntreikam ïa ka Load Shedding kaba long hapdeng 2 kynta haduh 4 kynta ha ka shisngi ha kiba bun ki jaka khamtam ki jaka nongkyndong.
Ha ka jingïalang bishar kam bad ki Power Regulator na ka Sorkar Pdeng, ki Jylla bad ka Joint Electricity Regulatorry Commission ba long mynta u bnai, u Myntri ka Sorkar Pdeng ba khmih ïa ka Power and New & renewable Energy RK Singh ula ban jur ba ki kompani sam bording ki dei ban pyntreikam noh ïa kane ka Rule.
Ula ong ba ki State Power Regulator ki dei ban pynthikna ba ki nongthang bording elektrik ki dei ban ïoh ïa ka bai lutksan na ki kompani sam bording lada ki pynlip bording khlem ka nongrim kaba shonghok.