Shillong, Nohprah, 22: Ki shipai Border Security Force (BSF), da ka jingïatreilang bad ki Pulit ka jylla Meghalaya, ki la ïoh ban khanglad ïa ka jingthmu ban shalan tuh ha khappud ka India-Bangladesh da kaba ïoh kurup ïa ki masi, ki soh apul bad kiwei kiwei ki mar kiba shongdor haduh T. 31.13 lak ha East Khasi Hills (EKH) bad ha West Jaiñtia Hills (WJH).
U kyrwoh ba la phah da ka tnat BSF Meghalaya ka la pyntip ba ïa kine ki mar khaïi tuh la ïoh kurup katba ki snar khaïi tuh ki dang thmu ban pynrung tuh sha ka ri Bangladesh.
Hadien ka jingïoh jingtip kaba bniah na ka tnat syntiat ki shipai BSF jong ka 4th Battalion, ryngkat bad ki Pulit ki la pynlong ka jingkhynra lang hajan khappud. Ha ka jingkhynra, la lap bun tylli ki masi khlem nongsharai ba la teh ha ki dieng. Mar mar ki shipai BSF bad ki Pulit ki la kurup noh ïa kine ki masi.
Ha kawei pat ka jingkhynra ki shipai BSF ki la ïoh kurup ïa ki synduk thep soh lyngba ka jingïoh jingtip na ka tnat syntiat. Ïa kine ki synduk ba la buhrieh ha kawei ka khlaw hajan khappud, la thmu ban shalan tuh sha ka ri Bangladesh.
Ïa ki masi bad ïa ki synduk soh la aiti noh sha ki Pulit ka Meghalaya bad sha ka ophis Custom ban leh ïa kaba donkam katkum ki kyndon jong ka aiñ.
Ha ka sngi Palei jong ka taiew ba ladep, ki shipai BSF ki la ïoh kurup ïa ki mar khaïi tuh kiba shongdor T.10.60 lak ba la thmu ban khaïi tuh sha ka ri Bangladesh.
Lyngba ka jingïoh jingtip na ka tnat syntiat, ki shipai BSF ki la pynlong ïa ka jingkhynra ha shilynter ka khappud Indo-Bangladesh ha ki bynta jong ka West Jaiñtia Hills (WJH) bad East Khasi Hills (EKH).
Katba ki shipai ki dang pynlong ïa ka jingkhynra, ki la ïohi ïa ki briew ki bym lah ban ithuh durkhmat katba ki dang thmu ban hiar sha khappud ryngkat bad ki mar khaïi. Tang shu ïohi ïa ki shipai, ki nongkhaïi tuh ki la phet krad sha ka khlaw kaba don hajan da kaba shim kabu ïa ka jingdum jong ka miet ban lait na ka jingshah kem.
Katkum u kyrwoh ba ka tnat shipai BSF, ha ka jingtalasi ki shipai ki la lap ïa ki mar khaïi tuh ba la buhrieh bha bad ïa kine ki mar khaïi tuh la aiti noh sha ka ophis Customs ban leh ïa kaba donkam katkum ka aiñ.
Shwa kane, ki shipai BSF ki la ïohbat ruh hynñiew ngut ki poiwir Bangladeshi katba ki dang pyrshang ban jam be-aiñ sha shiliang jong u pud u sam ka ri India na ka shnong Rattachera, East Jaiñtia Hills District, la ïathuh ki shipai BSF.
Ki shipai BSF ki la ïathuh ba kine ki poiwir Bangladeshi ki la shah pynngop ha ki riewshim kabu kiba dawa pisa T. 7,000 hajar Taka (pisa Bangladesh) ban ïoh rung tuh sha India bad kular ruh ban pynïoh jingsumar ei ha Kolkata na ka bynta ar ngut na ki.
