Ki kyndon tih dewïong jong ka sorkar na ka bynta ki high level bad jong ki high level, ka jingtim ïa ki riew paidbah : SHM

Khliehriat nohprah 23: Ki san tylli ki sengbhalang kiba don hapoh ka shatri jong ka Save Hynñiewtrep Mission (SHM) kiba kynthup ka Hynñiewtrep Youth Council, ka Hynñiewtrep Achik National Movement, ka Jaiñtia Students Movement, ka East Jaiñtia National Council bad ka CORP, ki pynpaw ka jingpyrshah halor ki kyndon ba la pyllait da ka sorkar jylla ha kaba ïadei bad ka kam tih dewïong, halor kane ka SHM ka la pynsaphriang ïa ki jingthoh lyngba ki kot lyngkdop kaba long kum ka jingpynshai sah ki paidbah ha kaba ïadei bad ka jingpyrshah ka SHM ïa ki kyndon .
Katkum ka jingthoh ba la sot na ka kot lyngkdop la ong ba “Ki mar poh khyndew ha ka bri hynniewtrep ki dei jong ki trai ri, trai muluk bad kim shym la dei satia jong ka sorkar India ne ka sorkar Meghalaya.Ka jingtih ïa ki mar poh khyndew khamtam eh ïa u dewïong bad ïa u maw shun ka la long ka kam kaba ki khun u hynniewtrep ki la trei slem bah bad kane ka la long ka kam kaba kyrshan ïa kiba bun bah ki long iïng la ki long ki iïng ba duk ne ki iing ba riewspah ruh kumjuh. Naduh ba ka National Green Tribunal (NGT) ka la khang ban tih dewïong (rat hole mining) ka jingtih bad jingshalan ïa u dewïong ha ka jylla Meghalaya ka la long kaba thut bad kane ka la ktah ïa ka ïoh ka kot jong ki nongshong shnong. Nalor kata ka la don ruh ka jingpynbor ban pyntreikam noh ïa ka MMDR Act hapoh ka jylla Meghalaya”
“Ka Dorbar thaw aiñ jong ka jylla Meghalaya ha ka por ba long myntri rangbah u Dr Mukul Sangma ka la mynjur ïa ka rai (resolution) ban kyrpad ïa ka sorkar India ban pyllait (exempt) ïa ka jingtreikam ka MMDR Act hapoh ka jylla da kaba pyndonkam ïa ka paragraph 12A(b) jong ka Sixth Schedule ka Constitution ka ri India, hadien kata , ka Dorbar Thaw Aiñ jong ka jylla sa shisien pat hapoh ka jinglong myntri rangbah u Conrad Sangma, ki la mynjur biang ïa ka rai (resolution) ban kyrpad ïa ka sorkar India ban pyllait ïa ka MMDR Act, kaba sngewsih ka long ba ka sorkar NDA kaba la ïalam da ka party BJP ïa kaba ka NPP ruh ka kyrshan lang, ka la kyntait ïa ka jingkyrpad ka Dorbar thaw aiñ bad kumta ka MMDR Act ka la treikam pura ha ka jylla Meghalaya”
“Ka Supreme Court jong ka ri India ka la pynmih ïa ka rai (judgement) ban pynskhem ïa ka jingpyntreikam ïa ka MMDR Act hapoh ka jylla Meghalaya, ki nongthaw aiñ (politician) ba hapoh ka jingïalam jong ki myntri (minister) bad ki MLA ka sorkar NPP ki la pynlong ka jingleh kmen ha bun ki jaka ban shim ba kata ka rai jong ka Supreme Court ban pyntreikam ïa ka MMDR Act ha Meghalaya ka long kaba jop bad ki la pynsawa ïa ka sur ba ka sorkar NPP ka la lah ban ailad biang ïa ki briew ban tih dewïong, ki briew ha ka jingbym sngewthuh bha ïa ka kam ki la kmen namar ki la pyrkhat ba ki la iohlad ban tih dewïong biang kumba long ha ki por ba la dep, phewse kim sngewthuh ba ki aiñ tih dewïong kiba eh bad kyllaiñ kum ka MMDR Act bad ki kyndon jong ka ki la ioh lad ban rung ha ka jylla Meghalaya”
“Ka sorkar MDA hapoh ka jingïalam ka NPP, ka la shim ïa ka rai ban pyntreikam noh ïa ka MMDR Act ha ka ban tih dewïong bad lyngba ka office memorandum kaba la pynmih ha ka 5.3.2021 ka la wanrah ïa kata ka kyndon halor ki jingdonkam ban ïoh ïa ki license ban tih dewiong (Standard Operating Procedure-SOPs for Grant of Prospective License and or Mining Lease for Coal in the State of Meghalaya), ha kane ka SOPs la shah tang ïa ki briew lane ki company kiba don ka khyndew ym duna ïa ka 100 hecter ba kin ïoh ïa ka license tih dewïong. Ka Mineral Concession Rules 1960 kaba la pynmih da ka Comptroller General, Indian Bureau of Mines, Nagpur ka shah ïa ki briew kiba don jaka ym duna ïa ka 4 hecter ban ïoh license katba ha Meghalaya pat la shah tang ïa ki briew kiba don jaka ym duna ïa ka 100 hecter.Ha kane ka SOPs la shah ruh ïa ki briew ban ïateh kular (agreement) bad kiba na bar jylla (non tribal) bad kita ki non tribal ki lah ban aplai ïa ka license tih dewïong”.
“ïa kane k SOPs la wanrah khnang da ka jingmut ba tang katto katne ki heh spah bad ki company kin bat marwei (control and monopolise) ïa ka kam tih dewïong ha ka jylla Meghalaya bad ki riew paidbah ba shu ïa pdeng (midlle class) kin nym ïohlad shun ban trei ïa ki kam tih dewïong namr ki shem jingeh ban don ïa ka khyndew kaba heh haduh 100 hecter bad kane kan wanrah ïa ka jinglum spah ba noh shiliang tang ïa ki katto katne ngut hynrei kiba bun ki hap ban shu peitkai.Kane ka SOPs kaba la saiñdur da ka sorkar NPP ka ktah bad ka long ka jingtim ïa ki riew paidbah bad ïa ki briew kiba shu pdeng ka ïoh ka kot.Ki briew kin shem jingeh ban thied ïa ka khyndew kaba kat kane bad haba kim lah ban don khyndew haduh katne ka jingheh kin hap ban shu die tat dor ïa ki khyndew jong ki ha ki heh spah ne ki company namar kan nym myntoi shuh ïa ki ban long trai halor kato ka khyndew lada kim lah ban ïoh license ban tih dewïong, ka ïoh ka kot na ka kam tih dewïong kan poi sa tang ha ki katto katne ngut ki heh saipan katba ki riew paidbah kin nym ioh lad shuh ban trei ïa ki kam dewïong”
“Kane ka jing ailad ïa ki non tribal ne ki bar jylla ban tih dewiong lyngba ka jingiateh kular ka long pyrshah ïa ka riti bat khyndew ha ka bri u Hynñiewtrep, ka long pyrshah ïa ka mynsiem jong ka Meghalaya Transfer of Land Regulation Act bad kan plie lad ïa ka khaïi benami hapdeng ki riew lum bad ki bar jylla (non tribal) hapoh ka jylla Meghalaya ïa kaba la kheiñ beaiñ, ki non tribal kin iohlad ban phrung khlieh ha ka kam tih dewïong bad ka spah ka phew jong ka jaitbynriew kan tuid sha kine ki non tribal, ka khaïi benami kan jur ha kane ka kam bad ka spah jong ka jaitbynriew kan shah ktah shi katdei eh”
“Ha kine ki sngi ngi iohi ba ka Meghalaya High Court ka la rai ba wat ïa u mawshun uba dei ban shalan sha kiwei ki ri (export) u dei u major mineral, kane ka kyndon ba yn shah ban tih dewiong tang ïa ki briew briew/company kiba don jaka ym duna ïa ka 100 hecter ka lah ruh ban hap ha kaba ïadei bad u mawshun namar ki la lah ban shim ïa u mawshun bad shalan sha bar kum u major mineral, kumba shim ïa u dewïong, kane ka SOPs hadien habud ka lah ruh ban rung wat ha ka kam tih maw shun bad kiwei kiwei ki major mineral”
“Ka Save Hynñiewtrep Mission ka la ieng pyrshah ïa kane ka SOPs kaba ktah mat ïong ïa ki riew paidbah bad ngin pan ka jingkyrshan ba radbah na phi baroh kiba ieng pyrshah ïa kane ka SOPs kaba long ka jingtim ïa ka jaitbynriew Hynñiewtrep hi baroh kawei”