Mih noh u Bah C.B Syiem na ka party UDP ha Ri Bhoi, lah ban leit pynïasoh sha kawei ka party ban ïakhun election na Nongpoh Constituency

Nongpoh, Nohprah 23: Sa tang da ki bnai ban poi noh sha ka jingjied ban pynthymmai ïa ki Nongmihkhmat sha ka ïing Dorbar Thaw aiñ ka jylla ha kane ka election 2023 kaba lah ban long ha u bnai Rymphang 2023 bad na ka liang u Vice President ka UDP Ri Bhoi District, U Bah C.B Syiem ryngkat ka kynhun mynta ka sngi ki la mih noh na ka UDP party.
Haba mih noh na ka UDP party, u Bah C.B Syiem uba dei u CEM barim ka KHADC lem bad kiwei ki nongïalam ki la phah ruh da ka shithi iehnoh kam sha u Secretary ka UDP Ri Bhoi, u Bah Michael Kharhunai ha ka jingdon lang u President ka UDP Nongpoh Circle, u Bah Andreas Syngkli ha ka ophis treikam ka UDP ha Nongpoh.
Kum ban pynktnmaw, u Bah C.B Syiem lem bad ka kynhun ki dang wan ban pynïasoh sha ka UDP ha Ri Bhoi ka dei ha ka 25 Tarik u Nailar 2022 hadien ba ki la mih noh na ka NPP party da ka jingbym hun ïa ka kyrtong, ka Kong Macdalyne Mawlong, kaba dei ruh ka MDC ka Umsning bad ha kane ka kynti ma u bad ka kynhun ki la mih na ka UDP halor ka jingbym hun satia ïa ki rukom treikam ka UDP party bad ka jingbym don jingkyrmen ba kane ka party kan lah ban leh ei ei ïa ki paidbah bad ïa jylla.
Kumba la pynpaw da u Bah C.B Syiem la ong ba ka jingmih jongki na ka party UDP kam don kano kano kaba pyrshah ïa ki nongïalam ne ïa ka party bad karkum ba ki la mad hadien ba la pynïasoh sha kane ka party kim sngew don jingkyrmen ba kane ka party kan lah ban leh ei ei ïa ka jylla bad ka ri.
“Ngi don ka jingsngew khia kaba jur ïa ki mat ki jura jong ka jaid bynriew kiba sahteng haduh kine ki sngi kumba la paw pyrthei kum ka jingjia ha Mukroh, ki kam pud ki kam sam kiba dang sahteng, kam don ka shongsuk shong sain bad lada ngim don hi kata ka jingïadei bad ka party kaba don ha ka bor la ka long ha jylla ne ha ka sorkar kmie baroh ki mat ki jura ka jaid bynriew kin nym urlong” ong u Bah C.B Syiem.