Leh burom ki shipai ka Assam Regimental Centre ïa ki ar ngut ki shipai kiba la khlad noh

12 ngut ki samla khasi kiba la khlad noh kum ki shipai ka ri India

0

Mawkyrwat, Nohprah, 23: Ki shipai jong ka Assam Regimental Centre ha ka 16 tarik jong mynta u bnai Nohprah, 2022 da ka mynsiem jong ka jingsngewlem ïa kiba ha ïing ha sem naduh ki kmie ki kpa, ki hynmen ki para jong ki ar ngut ki mynsiem kiba kordor kiba la khlad noh na ka bynta ka pyrthei bad kiba dei ruh ki shipai ïada ri ki la pynlong ïa kawe ka prokram ban kynmaw burom ha ryngkat ka jingwan buh syntiew ha ki mot sah jingkynmaw ha shnong Nongbah, Mawshilong, South West Khasi Hills District.
Lah ban kdew ba ki ar ngut ki mynsiem kiba kordor kiba la khlad noh ïa kaba ka kynhun shipai ka Assam Regimental Centre ki la leh burom ki long u (L) Kitborlang Lyngkhoi uba la khlad noh ha ka 16 tarik u bnai Nohprah, 2012 ha ka jingjia 2012 ha ka jingjia shah tyllep ha u thah ha Jamu & Kashmir, Glaciers bad u Skhemborlang Lyngkhoi uba la khlad noh hadien katto katne por na ka jingjia tyngkhuh kali.
U Major Aman Kirti, Assam Regimental Centre, haba kren ha ka jingïalang u la pynpaw ka jingaikhublei nyngkong eh na ka bynta ki kmie ki kpa jong ki ar ngut ki shipai kiba la khlad noh bad ïa kiba la ïadonlang. Haba bynrap shuh shuh ïa ka jingkren u la ong ba kum ki khun samla jong ka dong ka thaiñ ki dei ban peit nuksa ïa ki ar ngut ki samla kiba la shlur ban shim ïa ka synjam ban long ki nongïada ïa ka ri India lyngba ka jingrung sha ka kam shipai lyngba ka jingaimynsiem naduh ki kmie ki kpa bad ki bahaïing hasem. “Lada don ka jingpynshlur na ki kmie ki kpa, kum ki khun samla kim dei ban kyntait ban rung sha ka kam shipai”, ong u Major Aman Kirti.
Namarkata, u la ong ba kum ki khun samla haba ki leh ïa kano kano ka kam ruh dei ban buh ruh ïa ka thong haei ki thmu ban kynjoh namar khlem ka thong kin nym poi sha ka jingjop. U la kyntu ruh ba lada ki khun samla jong ka ri ki rung ha ki kam shipai kan don ruh shibun ki jingkylla ka ban wanrah ïa ka shong ka thaw namar kum ki shipai ki hap ban ïa imlang ïa sahlang de bad kiwei pat ki jaidbynriew, bad lyngba kane kin ïoh jingmut kumno kiwei ki jaidbynriew ki leh. Ula ong ruh ba hapoh ka kam shipai, kam don kata ka jinghikai ban don ka jingpynïapher niam, pynïapher jaidbynriew hynrei ki hikai ban ïalong kajuh kum shipara ha ryngkat ka jingïatreilang ban ïada la la jong ka ri India ba ieit jong ngi.
U la kyntu ruh ba kane ka sngi kam dei shuh ka sngi jong ka jingsngewsih hynrei ka la dei ka sngi jong ka jingaimynsiem bad jingpynshlur ïa ki khun samla jong ka ri ba kin mih shakhmat ban nym ong ba ka kam ka kyrduh hynrei ki dei ban wad lad ruh ban ïoh ruh lyngba ki kam shipai.
U bah Renikton Lyngdoh Tongkhar, MLA ka Mawkyrwat Constituency bad myntri ka tnad Umbam Umdih jong ka Jylla Meghalaya u la ong ba kane ka dei ka sien kaba nyngkong ïa u ban ïoh ban don ha kum kane ka jingïalang ban kynmaw burom ïa ki khun samla ba shlur jong ka ri bad ka jaidbynriew kiba la len lade ban ïada na ki nongshun. U la ong ruh ba ka jingmih jong ki ar ngut ki khun samla ban long ki nongïada ïa ka ri lyngba ka kam shipai ka la long shisha ka jingsarong ïa ki bad khamtam eh na ka bynta ki kmie ki kpa kiba la sei bad ai mynsiem ïa la ki khun ban rung ha ka kam.
Namarkata, lyngba kane ka sngi u bah Renikton u la ai mynsiem na ka bynta ki khun samla jong ka dong ka thaiñ ba kin peit ïa ka nuksa ba bha ban nym don ka mynsiem jong ka jingsheptieng ban rung ha ka kam shipai.
Katba na ka liang jong u Buam Myrchiang, Meghalaya Ex-Service League u la pynkynmaw ba ki don 12 ngut ki khasi kiba la khlad noh kum ki shipai jong ka ri India bad ki khlad ha ka por ba ki dang don ha ka jingtrei bad kiwei de ki jingjia.
Kiba la ïadonlang ha kane ka sngi ki long Col Gautam Kumar Rai, Director Sainik Welfare (ba la shongthait), u Buam Myrchiang, Meghalaya Ex-Service League, ki shipai kiba la shongthait na kylleng ki jaka, kiba ha ïing ha sem jong ki ar ngut ki mynsiem kiba kordor bad kiwei de kiba la shah khot sngewbha.
Ïa la ka jingïalang ha kane ka sngi la pynïaid da u Dr. P. Lyngdoh bad ka jingkren khublei na u bah Synshar Lyngkoi.

Leave A Reply

Your email address will not be published.