Hadien ka jingshah jyrwait shkor ha ka High Court of Meghalaya, khatduh ka sorkar ka la sdang ban pyni kam bad ban sei madan ïa ka jingtreikam ki Coke Factory beaiñhq Shallang. Haduh mynta ki don saw tylli ki karkhana thang dewïong kiba la shah pynpra. Hynrei u Deputy Commissioner ka West Khasi Hills Bah Garod LSN Dykes, u la ïathuh ba ki don haduh 57 tylli ki Karkhana beaiñ kiba kum kine bad 14 tylli kidei kiba la ïoh jingbit na ka Single Window Agency, tanba ym pat shah ban kin plie.
U Deputy Commissioner u la pyntip ba kane ka jingpynpra ïa ki karkhana coke ba beaiñ ka la sdang naduh ka 7 tarik Naitung.
U la ïathuh ba katkum ka hukum ba pynmih naduh u bnai Nohprah 2022, ki don haduh 57 tylli ki karkhana coke ba treikam beaiñ ha ka thaiñ Shallang. Hynrei napdeng kine, 14 tylli ki dei kiba la don ïa ka Single Window Clearance tangba kim pat don satia ïa ka jingbit ba kin treikam.
Katkum ka jingong jong u, kine baroh 57 tylli ki karkhana ki dei kiba la khang khyrdep naduh u bnai Nohprah 2022. Haba kylli halor ki karkhana ba pynpra hynne ka sngi nyngkong, u Deputy Commissioner u la ong ba ka kynhun na ka Ophis ki la don sha Shallang ban pynpra ïa ki karkhana ba beaiñ, hynrei namar ka jingthut ka mobile network, haduh mynta um pat ïoh satia ïa ka kaiphod.
Lah ban kdew hangne ba kane ka jingpynpra ïa ki karkhana coke, ka la wan jia ruh hadien ka jingïai tynjuh jong ka Ïing Kashari Meghalaya High Court ïa ka Sorkar Jylla, halor ka jingkuman ban leh eiei pyrshah ïa kine ki karkhana bad ruh ïa ka kam tih dewiong beaiñ.
Hynrei ka jingkylli kaba mih ka long kumno haduh 57 tylli kine ki jait Karkhana ki ïoh lad ban treikam tang ha Shallang. Balei ba ka sorkar kam patiaw ïa ka jingmih kine ki karkhana la katta snem. Shano jah ka Pollution Control Board. Hato ym donkam ban don ki Public Hearing haba mih ki karkhana kiba kum kine kiba ktah ïa ka mei mariang bad khamtam eh ïa ka koit ka khiah ki paidbah?
Hato ki bor jong ka District Council ki dei ne em ban tip haba mih ki Karkhana kiba kum kine, haba ka Shallang ka hap hapoh u pud u sam jong ka KHADC. Ne ki don jingtip lang, tangba ki leh kum bym ïohi kum ba leh ki bor sorkar jylla.
Haba kine ki karkhana ki treikam beaiñ, hato kan long kumjuh kumba long ka jingkhaïi dewiong beaiñ, haba ka sorkar kam ïoh khajna eiei, hynrei ka pisa pat ka leit tang sha ki katto katne, wat lada ka dor jong u dewïong ka long kaba remdor.
Kine kidei ki jingkylli kiba ka sorkar bad ka KHADC kadei ban jubab. U paidbah ruh udei ban khih bad buh jingkylli namar kane ka paw shynna ïa ka jingreikam beaiñ kaba don ha kane ka jylla. Dei ban ai jingïaroh ïa ka High Court of Meghalaya kaba la tuklar haba ka ïohi ïa kine ki jingtreikam bym hok ha ka sorkar jylla naduh kine ki snem baladep.
