Shillong, Rymphang 26 : U Myntri ka Tnad Civil Defence & Home Guards u Ma Comingone Ymbon ha ka sngi Nyngong ula ong ba ka Home Guards ka dei ka Voluntary Organization bad ka jingthung ïa ki Home Guards Volunteer ka dei da ka mon sngewbha bad ki home guards volunteer kim lah ban kam thungkam pura lane pynneh shirta ïa ka jingshakri jong ki.
Haba jubab ïa ka jingkylli ba wanrah u MLA ka VPP na Nongkrem, u Bah Comingone ula ong ba ka jingthung kam ba la kot bun snem kam ai satia ïa ka hok ïa ki home guard volunteer ba kin bat sah ïa ka kam bad ai ïa kano kano ka hok halor ka jingthungkam ba shipor ne shirta bad ki agency ba thung ïa ki.
Ula ong ba ka Tnad Civil Defence & Home Guards ka dei tang ka Agency jong ki Home Guards Volunteers ba la thung da ki Agency bapher bapher. Nalor kane, ki home guards volunteers ki dei kiba shah pynïaid kat kum ki rules bad ki kyndon bala buh da ki agency ba aikam ïa ki.
Ka kamram ban siew tulop/allowance sha ki home guard volunteer ruh ka shong ha ki agency ba aikam ïa ki, ula ong haba bynrap ba baroh ki kam ba ïadei bad ka jingshakri jong kine ki volunteer kum ka jingpynsangeh aikam noh ïa ki, ka jingthungkam biang, bad kiwei kiwei, ka shong ha ka bor jong ki agency kiba siew ïa ki jingsiew baroh.
U Myntri ula ong ba ka Tnad kala pyrshang ban wad ïa ki lad ki lynti kumno ban leh eiei halor ki jingud jingnam jong ki Home Guards.
