Ki consultant ba thung da ka sorkar ki la pynlut kai ïa ka por ban ïalehkai PUB-G, kynnoh u Bah Ardent

Shillong, Lber 07: U nongïalam ka liang pyrshah na ka seng Voice of the People Party (VPP) u Bah Ardent Miller Basaiawmoit ha ka sngi Thohdieng u la kynnoh ba ki consultant ba la thung da ka sorkar jylla ka dei tang ka jingpynlut kai ïa ka por kumba ïalehkai “PUB-G”.
“Ki consultant ba la thung da ka sorkar jylla ki la bun kam ban ïalehkai PUBG. Kane kam dei ka lynti naba ki shaniah beit ha ki nongshong shnong hynrei ki ïoh lut ïa ki lad jingmyntoi,” ong u Bah Bassaiawmoit haba ïa shim bynta ha ka general discussion halor ka mang tyngka.
U la buh ruh ka jingkylli ba lada la thung ïa ki consultant kan don jingmut aïu ban don ki engineer, MCS bad kiwei ki officer haba kim lah ban trei ïa la ka kamram.
“La pyntip ïa nga ba ki don katto katne ki officer kiba khem kam khlem jam bad kine ki consultant kim burom ruh wat ïa ki officer naba ki don ka jingïadei kaba jan bad u Myntri Rangbah bad ka ophis jong u bad kane ka la ktah ïa ka burom bad ka iktiar jong ki officer ha ki tnat bapher bapher,” ong u Bah Basaiawmoit.
Shuh shuh u MLA ka Nongkrem u la kren ruh halor ki arngut ki Adviser ka sorkar jylla ba ki lap mied ban peit cricket ha Dubai wat hapdeng jong ka jingdon ka dorbar mang tyngka ha ïingdorbar Thaw aiñ.
“Wat hapdeng ka jingdon ka dorbar mang tyngka, arngut ki nongai buit ka sorkar ki lap mied ban peit cricket ha Dubai. Kane ka wanrah ka jingkylli kaba heh bha bad ki paidbah ki don ka hok ban kylli ïa ki nong aibuit ba ki la pynlut kai ïa ka pisa jong u paidbah bad ki pyndonkam ruh ïa ki lad jingmyntoi jong ka sorkar,” u la ong.