Shillong, Naiwieng 21 : U Kevin Christopher u la khyrwit ïa ka shiteng spah ron (half-century) na bynta ka Meghalaya hynrei ka dang shah rem pat da phra wicket ha ka Himachal Pradesh ha ka lympung ïalehkai U-25 Men State A Trophy ha ka jingïalehkai hynne ka sngi Nyngkong ha Mohali.
Ka Meghalaya kaba rem ha ka jingkynting pisa, ka la hap ban tied nyngkong ha kaba ki lai ngut ki rangtied bol sdang ki la shah pynhap wicket noh khlem da ïoh ban kamai ron.
Hynrei u Josiah Momin (36) bad Christopher (52) kiba la wan ban mih maadan ki la ïarap ïa ka kynhun ban kamai ron lang da 93 ron na bynta ka jingduhnoh saw wicket. U Jaskirat Singh bad u PM Santhosh, ki la kamai mar 17 ron ha kaba u PM Santhosh u la neh wicket haduh ba kut ka jingïalehkai.
Ki hynriew wicket kiba khatduh ki la shah pynhap ha ka jingkamai ba ïoh 31 ron ha kaba ka Meghalaya ka la shah pynhap lut baroh ki wicket da kaba kamai 152 ron ha ki 49.2 over.
Ha ka pali tied, baroh arngut ki rangtied sdang ka Himachal Pradesh ki khyrwit mar kawei ka half-century shwa ba kin shah pynhap wicket ha u Manish Sharma (2/51). Watla ki la shah pynhap wicket noh pynban kam shym la ktah ïa ka Himachal Pradesh kaba la lah da kaba suk ban kynjoh sha ka thong tang ha ki 23.4 over.
Ka Meghalaya kan hap ban pynkhlaiñ bha khamtam hadien ba ka la shah rem arsien ha kaba kan pynkhreh pat ban ïakhun pyrshah ïa ka Railways ha ka sngi Balang.
