Nongpoh, Naiwieng 29: Ka seng Hynniewtrep Integrated Territorial Organization (HITO), Eastern Zone hapoh ka jingïalam jong u samla Will Star Sun President bad u Victor Duia Secretary lem bad ki dkhot ka Mawbuh Area mynta sngi kila leit ban khynra ïaki kot ki sla jong ki nongtrei ha Umroi Airport hadien ba ka seng kala ioh jingtip halor ka jingwan trei da ki nongtrei ki bym biang ïaki kot ki sla khamtam ka labour license.
Ha katei ka jingkhynra jong ka seng kala lap ba bun naki nongtrei kim don satia ïaka labour license bad kiba pyndonkam da kaba la kut tarik, bad kum ka seng kala ai por 2 sngi ïaka kompani ba kan pynbiang ïaki kot ki sla ba donkam.
Naka liang u Will Star Sun kum u President u la maham ïaka kompani ba wanrah ïaki nongtrei ba ka dei ban shim ka jingkitkhlieh ban pynbiang ïaki kot ki sla jong ki nongtrei khamtam ki labour license, bad ruh ba ka dei ban pyrkhat lem ban ai kam ïaki briew na katei ka thaiñ.
