Khur takma u Johny Nongrum na ka MMA Indian Fight Series ha Lucknow

Nongpoh, Nailar 24: Namar ka jingsarong bad ka jingkmen halor ka nam jop bala wanrah da u Samla Johny Nongrum u ba dei ruh u Sports Secretary ka kSU North Khasi Hills District, naka jingïakhun MMA Indian Fight Series kaba la long ha Lucknow, Uttar Pradesh, ka KSU North Khasi Hills District mynta ka sngi kala pdiang burom ïa utei u samla ha Byrnihat. Ha kane ka jingïalang pynkup burom ïa u Samla Johnny Nongrum da ki nongïalam ka KSU NKHD Unit la don ryngkat naduh u Bah Lambok Joseph Rymbai Vice-president KSU NKHD Unit, Ki nongïalam ka KSU Byrnihat Circle, Nongpoh Circle, KSU Northern Border Area bad kiba ha ïing hasem u Samla Johnny Nongrum.
Haba kren ha katei ka sngi naka liang ki nongïalam ka KSU North Khasi Hills District kila ai ka jingïaroh bad pynpaw ka jingsngew kmen kaba khraw halor ka nam bad ka burom kaba u la wanrah na katei ka jingïakhun MMA kaba heh haka ri, wat hapdeng ki khyndiat por kiba u la ioh ban pynkhreh ïa lade shwa ba un leit ban ïakhun sha katei ka Main Event, hadien ba u khlem ioh pynkhreh bha namar ba bun ki daw.
Na ka liang u Samla Johnny Nongrum u la pynpaw ka jingsngewnguh ïa ka seng KSU hi baroh kawei ka jingpdiang sngewbha bad ka jingaimynsiem ka jong ki naduh ki nongïalam ba hakhlieh, bad u kyrmen ruh ba nangne sha khmat un dang wanrah shuh shuh ïa ka nam bad ka burom na ka bynta ka Ri bad ka Jaitbynriew ha ki sngi ki ban wan.
Lyngba katei ka jingjop jong u Johny Nongrum u dei u rangialehkai MMA ba paw ka jylla, un sa leit pat ban mihkhmat ïaka Ri India haka jingïalehkai Muaythai haka ri Cambodia ha u bnai Nohprah.