Khur namjop saw tylli ki kynhun, ïakhaid kawei ka jingïalehkai

Shillong, Nailur 20: Ki jingïakhun jong ka lympung SSA U-20 4th DIVISION Football League 2023 kaba la pynlong ha madan 3rd Ground MFA Turf Polo hynne ka Sngi Balang.
Ka jingïalehkai kaba nyngkong ha ka por 10 baje mynstep ka la kut ha kaba ka Dilingiem YSCWA ka la ïoh ban khur ei shalade ïa ki lai point (0 – 3) namar ka kynhun Laitlulong SC kam shym la lah ban wanpoi (walk-over).
Ha ka jingïakhun kaba ar ha ka por 11:30 mynsngi, ka Laitumkhrah SC  ka la pynjemkhnap ïa ka Mawphlang SC da kaba pynbam haduh 4-0 kol. ïa ki kol na bynta ka Laitumkhrah SC la thep da u Hamlet Thabah (34 min), u Maban Lanong (35min), u Ivan Garry Kharbuli (70min) bad khadduh na u Aldhues Nongbri (70+3min).
Haba phai pat sha ka jingïalehkai kaba bud, ka Mawlynrei SC ka la ïoh ban khur ïa ka namjop ha ka jingïakhun kaba jwat da 3 – 2 kol pyrshah ïa ka Lumpyngngad SC ha ka jingïalehkai kaba la long ha ka por 1:30 nohphaisngi.
Ki lai kol na bynta ka Mawlynrei SC ki la wan lyngba u Heraldo Kyrsian ha ka minit ba 4, nangta bud sa ki ar kol na u Kerry John Marboh ha ka minit ba 61 bad 67. Katba ïa ki ar kol na bynta ka Lumpyngngad SC la thep da u Eladmi Pastieh (8 min) bad u Donlang Kharsyiemiong (41min).
Ha ka jingïakhun kaba saw kaba la sdang ha ka por 3 nohphaisngi, ka Madanrting SC  ka la mad ïa ka namrem da 0 – 2 kol ha ka Nongkolew SC. ïa kine ki ar kol jong ka Nongkolew SC la thep da u Shain Mujai (45 & 68 min).
Ka jingïakhun kaba khadduh ha ka por 4:45 janmiet, hapdeng ka Mawklot SC  pyrshah ïa ka Lummawbah SC ka la jam sha kaba kut da ka jingïakhaid, ha kaba baroh arliang ki la ïoh ban thep mar shi kol.
Ka Mawklot SC ka la ïoh ban pynkhihjar nyngkong lyngba u Paila Rapsang (7 min) katba ka Lummawbah SC ka la ïoh ban pynïakhaid lyngba u Deron Kharpuri ha ka minit ba 33. Yn pyntyllun biang ïa ki jingïakhun ha ka 22 tarik.